Gizartea -
BIZKAIA
Gizon bat atxilotu dute Bilbon beste bati labanaz eraso egiteagatik
Erasoa Olabeaga auzoko tren geltokiaren atzeko aldean gertatu da. Biktima Basurtuko Ospitalean dago.
AGENTZIAK | EITB MEDIA
Ertzaintzak gizon bat atxilotu du Bilbon beste bati labanaz eraso egin eta zauri larriak eragitea egotzita, Eusko Jaurlaritzako Segurtasun Sailak gaur jakinarazi duenez. Biktima Basurtuko Ospitalean dago.
Erasoa atzo 18:00ak aldera gertatu zen Olabeaga auzoko tren geltokiaren atzeko aldean.
Hainbat lekukok emandako testigantzaren arabera, ustezko erasotzailea duela aste batzuk erre zen txabola batean bizi zen. Atzo biktima bere bizilekutik irten zela baliatuta, haren txabolan sartu zen.
Txabolako bizilaguna itzuli zenean bien arteko borroka hasi zen, eta ustezko erasotzaileak labana behin eta berriro sartu zion gorputzean. Zauritutako gizonak ihes egitea lortu zuen eta ertzainek lurrean etzanda aurkitu zuten. Ondoren, beste gizona atxilotu egin zuten.