Soldatetan berdintasuna errespetatzen ez duten enpresei laguntzak kenduko dizkie Administrazioak EAEn

Soldaten alorrean gizonen eta emakumeen arteko berdintasunaren printzipioa errespetatzen ez duten enpresa eta erakunde pribatuei emandako diru-laguntzak kendu ahal izango dituzte Euskadiko administrazio publikoek.

Hori da, hain zuzen ere, Eusko Jaurlaritzak diseinatu duen Emakume eta Gizonen Berdintasunerako Lege-proiektuan sartu den berritasunetako bat, EAJk, PSE-EEk, EH Bilduk eta Elkarrekin Podemos-IUk elkarrekin egindako zuzenketa baten bidez.

Artikuluaren arabera, sektore publikoko erakundeek gardentasuna bermatu beharko dute ordainsarien arloan, eta dagozkien soldata-auditoretzak egin beharko dituzte. Sektore pribatuan, berriz, euskal sektore publikoaren diru-laguntza jaso edo kontratatzen duten enpresa eta erakundeek gardentasunaren eta emakumeen eta gizonen arteko ordainsariaren aurrean berdintasun-printzipioa bete beharko dute.

Diskriminazioaren zantzurik antzemanez gero, erakundeei epe bat emango zaie hori justifikatzeko edo zuzentzeko. Hala egiten ez badute, "kontratuaren edo diru-laguntzen prozesuan zehazten den zigorra edo ondorioa jasoko dute, besteak beste, diru-laguntza galtzea" edo kontratuaren amaiera eta jasotako zenbatekoak itzuli beharra.

2005. urteaz geroztik indarrean dagoen araudia aldatzen duen testua aurreko legealdian Emakundek egin zuen berbera da, eta Gobernu Kontseiluak joan den urtarrilaren amaieran lege-proiektu gisa onartu zuen, baina Legebiltzarra desegin zenean bertan behera geratu zen. Orain, asteazken honetan Legebiltzarreko batzordean irizpena onartu ondoren, araua behin betiko onartuko da oraindik zehaztu ez den hurrengo osoko bilkuran.

Legebiltzarreko talde guztiek, Vox alderdiak salbu (ordezkari bakarra ez da batzordera joan), ponentzian egindako lana eta arau honek berdintasunari eta indarkeria matxistaren aurkako borrokari begira suposatzen duen aurrerapena baloratu dute.