Hain zaila al da euskara ikastea?

Euskara ikasteko "zaila" dela esanez Gasteizko epaile batek berriki emandako epaiak harrabotsa eragin du Euskal Herrian. Izan ere, lanposturako euskara maila lortu ez zuen bitarteko langile bat berriro onartzeko agindua eman dio Gasteizko epaile batek Laudioko Udalari, euskal hizkuntza "munduko bosgarren zailena" dela argudiatuta.

Hari horri tiraka galdera hau erantzun nahi izan dugu: Hain zaila al da euskara ikastea? Euskara ikasten ari diren bi pertsonari galdetu diegu.

1)Nola izan zenuen euskararen berri?

Diana: Ingalaterrako unibertsitate batean gradua ikasten ari nintzela han master bat egiten ari zen urretxuar bat ezagutu nuen. Elkarrekin irteten hasi ginen eta masterra amaitutakoan bera Euskal Herrira itzuli zen. Ikasketak amaitu nituenean Euskal Herrira etorri nintzen eta geroztik bertan bizi naiz. Hona etortzerako banekien euskaraz esaldi hau esaten: "Kaixo, lagunak, zer moduz? Ni Diana naiz, ingelesa naiz".

Nazanin: Loreak filmaren eta Itziar Ituño-ren "Lourdes" paperaren bitartez ezagutu nituen Euskal Herria eta euskara. Ez naiz inoiz egon Euskal Herrian, ezta Espainian ere.

 

2)Zergatik hasi zinen euskara ikasten?

Diana: Euskal Herrira etorri nintzenean euskaraz ikasi behar nuela pentsatu nuen, nire bikotekidea euskalduna delako eta bere ingurua ere bai.

Nazanin: Itziar Ituñorekiko interesagatik eta bera ulertzeko beharragatik euskara ikasi nahi nuen. Eta nire errespetua erakusteko modu bat izan zitekeela pentsatu nuen.

 

3)Noiz hasi zinen euskara ikasten?

Diana: "21 urterekin (48 urte ditu gaur egun). Igande batean iritsi eta astelehenean hasi nintzen euskara ikasten Lazkaoko Maizpide barnetegian. Etorri aurretik lotuta neukan. Nik Lazkaoko ikastolako ikasleei, eskolaz kanpoko jarduera gisa, egunero hiru orduz ingeleseko eskolak ematearen truke, Maizpideko nire egonaldia ordainduko zuten.

Nazanin: Duela bi urte inguru (28 urte ditu gaur egun) hasi nintzen euskara serio ikasten.

 

4)Nola ikasi duzu euskara?

Diana: Formalki, zortzi hilabetetan ikasi nuen euskara Lazkaoko Maizpide barnetegian, egunean sei ordu inguru sartuta. Geroztik, modu formalean, ez dut euskara ikasten jarraitu. Hala ere, euskaraz irakurtzen dut eta egunero entzuten dut euskara kalean. Bikotekidearekin gazteleraz hitz egiten dut, haurrekin, ingelesez, eta lagunekin, euskaraz. Itzultzailea naiz eta euskaratik ingelesera ere egiten ditut itzulpenak.

Nazanin: Nire kabuz ikasi dut euskaraz: pelikulak ikusiz eta musika entzunez eta, batzuetan, albisteak irakurtzen.

 

5)Zenbat denboran ikasi duzu euskara?

Diana: Euskara serio ikasten zortzi hilabetean egin nituen Maizpiden, irailetik ekainera. Egunean sei ordu inguru.

Nazanin: Duela parte bat urte hasi nintzen euskara serio ikasten eta ia urtebete daramat euskara, orokorrean, ulertzen. Oraindik ez dut oso ondo hitz egiten, baina irakurtzen eta idazten hobeto moldatzen naiz.

 

6)Euskara zaila al da ikasteko?

Diana: Edozein hizkuntza ikastea da zaila, euskara ez da zailagoa. Ez da denbora gehiago behar euskara ikasteko beste edozein hizkuntza ikasteko baino.

Nazanin: Bai, erabat. Oso hizkuntza zaila da.

 

7)Zer egin zaizu ikasteko zailena?

Diana: Aditzak. Kondizionalak eta horrelako aditz luzeak, gutxi erabiltzen direnak, horiek dira zailenak niretzat. Saiatzen naiz ikasten, baina ahaztu egiten zaizkit. Bestela, euskara oso hizkuntza logikoa da.

Nazanin: Neure kabuz ikasi behar dudala eta ez daukadala iturri zehatzik. Gehienetan hiztegi desberdinak erabili behar izaten ditut. Gainera, arazoak ditut hitzak ahoskatzeko.

 

8)Euskarak ez du munduko beste hizkuntza batzuen antzik. Horrek zailago egiten al du euskara ikastea?

Diana: Hiztegia erabat ezberdina da, egia da. Baina, hitzak ikasi eta kito. Halaber, zure ama hizkuntzaren eta ikasten ari zaren hizkuntzaren arteko tarteak ere eragiten du.

Nazanin: Euskara munduko beste hizkuntzekiko ezberdina izateak erakargarri egiten du eta, aldi berean, zaila egiten du ikastea.

 

9)Euskaraz ikasten jarraitzen al duzu?

Diana: Maizpiden egon eta gero, bitan eman nuen izena euskaltegian, baina segituan utzi nuen. Hortik aurrera, nire kabuz aritu naiz. Ni maila batera iritsi naiz nire ikasketa prozesuan eta hor pixka bat estankatuta gelditu naiz.

Askotan zerbait nola esan ez badakit gaztelerara pasatzen naiz azaltzeko eta gero berriro itzultzen naiz euskarara. Pentsatu ordez alferkerian erortzea errazegia da. Nire inguruan jende askok egiten du hori. Ni saiatzen naiz ez egiten, baina batzuetan nik ere egiten dut.

Nazanin: Ikasten jarraitu nahi dut, denborak uzten didan bitartean behintzat.

 

10)Zenbat hizkuntza hitz egiten dituzu?

Diana: Ingelesa, euskara eta gaztelera. Frantsesa ulertzen dut zerbait eta defenditzen naiz.

Nazanin: Nire ama hizkuntza persiera da. Horrez gain, ingelesa ere oso ondo dakit. Nire gaztelania maila ez da txarra, euskara ikasten ari naiz eta gero badakit apur bat beste hizkuntzetatik.