Gipuzkoako Fiskaltzak 121 urte eskatu ditu Kote Cabezudorentzat auzi nagusian

Gipuzkoako Fiskaltzak 121 urte eta erdiko kartzela-zigorra eskatu du Kote Cabezudorentzat argazkilari donostiarraren aurkako auzi nagusian. Auzi horretan 32 sexu delitu, haur-pornografia, iruzurra eta 1992 eta 2013 artean ustez egindako 16 modeloren osotasun moralaren aurkako delituak jasotzen dira. Ministerio Publikoak, gainera, hainbat konpentsazio ekonomiko eskatu ditu kaltetutako neskentzat, guztira milioi bat eurokoak.

Zehazki, honako delitu hauek egotzi dizkio Fiskaltzak argazkilariari: kopulaziozko hiru sexu-abusu delitu; sexu-eraso astundu bat; nagusitasun-abusua duen sexu-abusu delitu bat; adingabeak pornografia-materialak ekoizteko erabiltzea eta material hori hedatzea egindako zazpi delitu; adingabeen pornografia-delitu bat eta osotasun moralaren aurkako beste bat; intimitatearen aurkako hamaika delitu, ikus-entzunezko materiala zabaltzeagatik areagotuta, lau iruzur-delitu eta osotasun moralaren aurkako lau delitu.

Ministerio Publikoaren testuak azaltzen duenez, Cabezudok ustez bere "adin ezberdintasun nabarmenaz" eta argazkilari gisa egiten zituen saioen zuzendaritza posizioaz baliatu zen, "sexu harremanak izateko" horietako batzuekin, "haien baimenik gabe". Deskribatutako eta bizi izandako gertakarien ondorioz, biktima askok erasan psikologikoak dituzte.

Txostenean egindako ustezko delitu guzti-guztiak zehazten ditu Ministerio Publikoak eta antzeko jokatzeko modu bat deskribatzen du ia kasu guztietan: neskek, adingabeak horietako batzuk, kontratu bat sinatzen zuten, baina ez zitzaien "nahikoa informazio" ematen lortutako argazki-materialarekin egingo zenari buruz. Ondoren, Interneteko orrietan partekatzen ziren neskak biluzik agertzen ziren irudiak, aldatzen ari zirela ere hartuak batzuk eta "zatirik intimoenak" ikusten zirela.

Datorren urtearen hasieran Gipuzkoako Auzitegian epaituko duten auzi nagusiaz gain, Cabezudok ia laur urte daramatza behin-behineko espetxealdian eta dagoeneko bost aldiz zigortu dute kausa nagusi horretatik bereizitako beste hainbat auzi txikitan. Era berean, zigor arloko epaitegi baten beste epai baten zain dago, eta aurretik ditu beste bi epaiketa ere; martxorako bata eta datarik gabe bestea.