Gizartea -
Koronabirusaren semaforoa
Gipuzkoako zortzi udalerri handik 2.000 kasutik gorako intzidentzia dute
Arrasate, Azpeitia, Bergara, Deba, Eibar, Eskoriatza, Lazkao eta Villabona dira. Agurainen (Araba) behera egin du intzidentziak baina oraindik 2.500 kasu inguru biltzen ditu.
ANE SANTESTEBAN | EITB Media
(OHARRA: Koronabirusaren semaforoa astean bitan eguneratuko da aurrerantzean, astelehen eta ostegunetan)
Intzidentziak hazten jarraitzen du Euskal Autonomia Erkidegoan (EAE), covid-19ak herriz herri izan duen eragina neurtzeko erabiltzen duten semaforoaren arabera. 251 udalerritatik 227 udalerri dira, handi zein txiki, 150 kasu baino gehiagoko tasa dutenak (ostegunean baino 7 gehiago).
Bizkaian dago intzidentzia-tasarik txikiena (600 kasu 100.000 biztanleko), eta, ondoren, Araban (900 kasu) eta Gipuzkoan (1.400 kasu). Azken honetan nabarmentzekoa da zortzi udalerrik 2.000 kasuko langa gainditzen dutela.
Arabak gorri jarraitzen du, eta intzidentzia 1.000 kasutik gertu dago (978 kasu), Gasteizen (973 kasu) eta Amurrion (929) bezala. 3 herri gehiago gehitu dira eremu gorrira eta guztira 44 dira.
Agurainen intzidentziak behera egin badu ere, oraindik 2465ean kokatzen da. Udalerri txikien artean, Asparrena nabarmentzen da, 4.393 kasuko intzidentzia-tasarekin. Atzo 9 positibo berri zenbatu ziren.
Bizkaian ere hazi egin da intzidentzia 100.000 biztanleko, 488 kasutik 601 kasura. Ez da, baina zerrendara udalerri berririk batu eta, hortaz, guztira 98 udalerrik jarraitzen dute eremu gorrian.
Bilbon 171 positibo berri izan ziren atzo, eta intzidentzia 513 kasukoa da 100.000 biztanleko (ostegunean 376koa zen). Ermua eta Ondarroa dira oraindik ere eragin handiena duten herriak, 100.000 biztanleko 1.500 kasu baino gehiago baitituzte biek.
Gipuzkoak lurralde zigortuena da, eta dagoeneko 1.400 kasuko langa gainditu du 100.000 biztanleko. 5.000 biztanletik gorako herri guztiek eremu kritikoan jarraitzen dute, eta horietatik zortzik 2.000 kasuren muga gainditzen dute: Arrasatek (2.803), Azpeitiak (2.897), Bergarak (2.267), Debak (2.218), Eibarrek (2.041), Eskoriatzak (3.022), Lazkaok (2.077) eta Villabonak (2112).
Covid-19aren semaforoa Europar Batasunak (EB) onartutako kolore-maparen egokitzapena da, eta azken 14 egunetan metatutako intzidentzia-tasa jasotzen du.
