Gizartea -
Koronabirusaren semaforoa
Araba eta Bizkaia ere eremu horira igaro dira
Hala, EAEko hiru lurraldeak hori margotuta ageri dira. Gainera, Berango, Getxo, Gorliz eta Leioa gorritik irten dira.
A. S. | EITB Media
Araba eta Bizkaia eremu laranjatik irten dira azken orduetan, eta hortaz, EAEko hiru lurraldeak daude momentuz, eremu horian, covid-19ak EAEn herriz herri izan duen eragina neurtzeko Eusko Jaurlaritzako Osasun Sailak erabiltzen duen semaforoaren arabera. Gorritik irtetea lortu dute, bestalde, Berangok, Getxok, Gorlizek eta Leioak, baina Balmaseda eremu latzenera itzuli da datuak okerrera egin eta gero.
Euskal Autonomia Erkidegoa, beraz, eremu laranjatik horira igaro da, eta transmisio "handiko" agertokitik "tentsio handiko" agertokira igaro da. Azken orduetan 397 kutsatze berri atzeman dituzte.
Arabak (288 kasu 100.000 biztanleko) eremu laranjatik horira igarotzea lortu du azken orduetan. Gasteizek eta Amurriok laranjari eutsi diote eta, Agurainek eta Laudiok, berriz, horiari. Ez dago, hortaz, udalerririk ez eremu gorrian ezta berdean ere.
Bizkaiak ere laranja atzean uztea lortu du (298 kasu 100.000 biztanleko) eta sei udalerrik jarraitzen dute une honetan eremu gorrian: Bermeok, Gernika-Lumok, Lekeitiok, Sopelak, Zallak eta Balmasedak, egoerak okerrera egin baitu azken orduetan.
Laranjan daude Gueñes, Mungia, Santurtzi, Sestao, Zornotza eta gaurtik baita Berango, Getxo, Gorliz eta Leioa ere. Lau udalerri horietan intzidentzia jaitsi egin da. Ermuan, ordea, gora egin du eta horitik laranjara igaro da.
Horian, bestalde, Abadiño, Abanto-Zierbena, Arrigorriaga, Barakaldo, Basauri, Bilbo, Derio, Durango, Elorrio, Erandio, Ermua, Etxebarri, Galdakao, Markina-Xemein, Muskiz, Ortuella, Portugalete eta Trapaga; gaurtik baita Ondarroa ere, atzean utzi baitu eremu laranja.
Ez dago herri bakar bat ere berdean.
Gipuzkoak (283 kasu 100.000 biztanleko) eremu horiari eutsi dio. Bost dira eremu gorrian dauden Gipuzkoako udalerriak: Deba, Lazkao, Lezo, Mutriku eta Usurbil.
Laranja kolorez, berriz, Aretxabaleta, Elgoibar, Hernani, Irun, Lasarte-Oria, Legazpi eta Oiartzun daude. Gaurtik baita Eibar ere.
Horian dauden herriak Andoain, Arrasate, Astigarraga, Azkoitia, Azpeitia, Beasain, Donostia, Errenteria, Hondarribia, Oñati, Ordizia, Orio, Pasaia, Tolosa, Urnieta, Urretxu, Villabona, Zarautz, Zumaia eta Zumarraga dira. Bergara gehitu zaie, egoerak hobera egin ostean.
Ez dago udalerririk eremu berdean.
Europar Batasunak onartutako koloreen mapa egokitu du Jaurlaritzak, eta azken 14 egunetan metatutako intzidentzia-tasaren arabera sailkatzen ditu EAEko udalerriak.
