Gizartea -
KORONABIRUSA
Gora egin dute positiboek Nafarroan, hiru egunez jarraian behera egin ostean
Zehazki, 71 kutsatze zenbatu dituzte. Bezperakoak baino 23 gehiago dira, baina duela 14 egun baino 37 gutxiago.
Eider Garaikoetxea | EITB MEDIA
Hiru egunez jarraian beheranzko joerari eutsi ondoren, gorako bidea egin dute berriro positiboek Nafarroan, 71 kasu zenbatu baitituzte, Foru Gobernuak emandako datuen arabera.
Atzo egindako 2.353 proba diagnostikoetatik (bezperan baino 1.043 gehiago) % 3 izan ziren positibo. Hala, positibotasun tasa puntu bat baino gehiago jaitsi da (% 4,4an zegoen).
Bezperan baino 22 positibo gehiago dira, eta duela astebete baino bost gehiago. Dena dela, duela 14 eguneko 109 kasuekin alderatzen baditugu, 38 gutxiago dira.
Tuteran zenbatu dituzte, berriro, positibo gehien: sei. Iruñeko Mendebaldean eta Antsoainen bosna kutsatze atzeman dituzte, eta Azkoienen eta Atarrabian, launa. Azkenik, Cintruenigon eta Iruñeko Azpilagañan, hiruna kasu zenbatu dituzte.
Ospitaleetako egoerari dagokionez, ospitaleratzeak eta altak aintzat hartuta, 93 pertsonak jarraitzen dute ospitalean covid-19arekin (bezperan baino 14 gutxiago), eta horietako 19 ZIUetan daude (bat gutxiago), eta beste 12, etxean (aldaketarik ez). Gainerakoak, 62, plantan daude (13 gutxiago).
Txertaketa prozesuan, berriz, atzo 4.590 dosi eman zituzten, eta guztira 342.492 dira orain arte eman dituzten txertoak, jasotako 358.645etatik.
Txertaketa prozesua amaitu dutenen kopurua 114.771koa da, atzo 3.013k bigarren dosia jaso ostean.
