EAEko erresidentzietako adinekoak egunero atera ahalko dira paseora, gaurtik aurrera

Arabako, Bizkaiko eta Gipuzkoako erresidentzietako egoiliarrak egunero atera ahalko dira kalera, paseatzera, gaurtik aurrera, eta astean bi senideren hiru bisita jasotzeko aukera ere izango dute.

Foru aldundiek eta Eusko Jaurlaritzak zahar-etxeetako neurri murriztaileak arintzea erabaki dute, alarma-egoera amaitu dela eta txertaketa kanpaina aurrera doala kontuan hartuta.

Horrela, bada, adineko pertsonek egoitzatik ateratzeko aukera izango dute egunero, hala nahi izanez gero. Eta irteerek lehentasuna izango dute bisiten aurrean.

Horrez gain, "paseo terapeutikoak" lehenetsiko dituzte, "eremu itxiak eta jende asko pilatzen den tokiak saihestuz". Sarrerak eta irteerak antolatzeko ardura zentro bakoitzaren esku egongo da.

Zahar egoitzak dagoen herriaren intzidentzia tasak ez du baldintzatuko paseatzera ateratzeko aukera. Soilik erresidentzian covid-19 agerraldi bat antzemanez gero, galarazi ahalko da bertatik ateratzea.

Bestalde, egoiliarrek astean gutxienez hiru bisita izateko aukera izango dute. Horretarako gela bereziak izango dira eta bisitaldi bakoitzean gehienez bi senide bertaratu ahalko dira. Bisitak ordubetekoak izango dira.

Topaketa horietan segurtasun neurri zorrotzak hartuko dira eta derrigorrezkoa izango da musukoa erabiltzea eta eskuak garbitzea.