138 kutsatze atzeman dituzte Nafarroan

Kutsatzeek gora egin dute berriro Nafarroan, bi egunez 100etik behera egon diren arren. Astelehen honetan 138 kasu atzeman dituzte, Foru Gobernuaren behin-behineko datuen arabera.

Zehazki, astelehenean 2.883 proba diagnostiko egin dituzte (bezperan baino 1.231 gehiago), eta horietatik % 4,8 positibo izan dira. Horrenbestez, positibotasun tasa berdin mantendu da.

Bezperan baino 58 kasu gehiago zenbatu dituzte, baina duela astebeteko edo bi asteko zifrekin erkatuta, beherakada nabarmena ikus daiteke: orduko hartan 53 eta 101 positibo gehiago atzeman baitziren, hurrenez hurren.

Caparroson zenbatu dituzte kasu gehien (zazpi), Iruñeko Txantrean bezainbeste. Barañainen sei positibo egon dira, eta Huarten, Martzillan eta Iruñeko Mendillorri eta Buztintzuri auzoetan, bosna.

EAE

Covid-19aren pandemiak egonkortze zantzuak eman ditu Euskadin, azken orduetan 723 positibo berri atzeman ostean, igandean baino 102 gehiago, eta positibotasun tasa aurreko egunekoaren mailan jarraitu du, nahiz eta ospitale-presioak handia izaten jarraitzen duen: ospitaleratzeak igo egin dira (93 gehiago azken orduetan), eta zainketa intentsiboetako unitateetan koronabirusarekin dauden gaixoak 157 dira, zazpi gutxiago.

Espainiako Estatuan, Osasun Ministerioak beste 16.402 kasuren berri eman du, eta guztira 3.005.487 dira kutsatuak pandemia hasi zenetik. Gainera, 766 pertsona hil dira azken 24 orduetan: 63.061 dira Espainiako Estatuan hildakoak.