Gizartea -
Urnieta
Homizidioa genero larrigarriarekin izan da Nieblaren auziko epaimahaiaren erabakia
Hala ere, atzera bota dituzte ankerkeriaren larrigarria eta defentsak aurkeztutako aringarri guztiak.
agentziak | erredakzioa
Asier Nieblaren auzia epaitu duen epaimahaiak erabaki du auzipetuak homizidioa egin zuela genero larrigarriarekin.
Asier Niebla 28 urteko Urnietako (Gipuzkoa) gaztea 2018ko urriaren 11n hil zen, bi hilabetez Donostiako Ospitalean koma egoeran egon ostean. 2018ko abuztuaren 12an ospitaleratu zuten, buruan kolpe handi bat zuela.
Gertakaria egun hartako 05:00ak aldera izan zen, Donostiako Aste Nagusiko jaietako lehen egunean. Niebla neska batekin hizketan ari zela, Parte Zaharreko Perujuantxo kaleko taberna baten kanpoaldean, neskaren bikotekide ohiak jo eta lurrera bota zuen.
Sei epaiketa-saio egin ondoren, joan den ostegunean epaimahaikideek erabakia hartzeko eztabaidak hasi zituzten, Fiskaltzak defendatzen zuen behin-behineko doloa zuen giza hilketa ote zen; hildakoaren familiak eta Urnietako Udalak eskatzen zuten hilketa ote zen; edo, defentsak zioen bezala, lesio delitua ote zen erabakitzeko.
Era berean, epaimahaiak eztabaidatu behar zuen ea akusazio partikularrak eta herri akusazioak proposatutako "ankerkeriaren" eta "genero-arrazoiaren" larrigarriak eta defentsak eskatutako alkoholaren eta drogen ondoriozko intoxikazioaren aringarriak aintzat hartu behar ote ziren.
Faktore horien guztien arabera, Fiskaltzak 12 urteko kartzela-zigorra eskatu zuen, Niebla familiak eta Urnietako Udalak, berriz, 20 urtekoa. Denfetsak, berriz, zigor txikia eskatzen zuen.
Hainbat orduz eztabaidatu ostean, gaur gauean epaimahaiak behin behineko dolozko homizidoaren alde egin du, Fiskaltzak proposatutakoaren alde, alegia; izan ere, bere ustez, erasotzaileak bazekien kolpeak emanez Nieblaren bizitza "arriskuan" jartzen zuela.
Halaber, beste bi akusazioek eskatzen zuten "genero larrigarria" onartu du, baina defentsak eskatutako ankerkeria eta aringarri guztiak errefusatu ditu.
Epaia irakurri eta epaimahaia desegin ostean, magistratu presidenteak saio bat deitu du; eta ordurako, aldeek epaiarekin bat egiten duen zigor eskaera bat egin beharko dute.
