Osakidetza eta Histocell covid-19aren gaixoentzako sendagaia probatzen ari dira

Osakidetzak eta Histocell EAEko enpresa biofarmazeutikoak arrakastaz amaitu dute HC016 medikamentu zelularraren saiakuntza klinikoaren lehen fasea, covid-19ak eragindako arnas distres akutua tratatzeko garatua, gaixotasunaren heriotza-kausarik handiena baita.

Saiakuntza Eusko Jaurlaritzak finantzatu du partzialki (covid-19aren I+G-rako laguntzen esparruan) eta Bizkaiko Biocruces Osasun Ikerketako Institutuaren eta Histocell enpresa biofarmazeutikoaren lankidetzarekin egiten ari da Gurutzetako Unibertsitate Ospitaleko ZIUn.

Julio Font Histocelleko zuzendariak azaldu duenez, saiakuntza klinikoa "ilusio handiz" iragarri zuten maiatzean, eta, zortzi hilabeteko lanaren ondoren, lehen fasea "itxaropen handiz" amaitu dute.

Gotzone Sagardui Osasun sailburuak "positibotzat" jo du urrats hori, terapien erabileran EAE mundu mailan kokatzen duelako. Hala ere, oraindik bidea dagoela egiteko onartu du.

Eusko Jaurlaritzak adierazi duenez, kanpoko segurtasun batzordeak sendagaiaren segurtasuna baieztatu du, kontrako ondoriorik gabe garatu baita. Gainera, emaitzetan eraginkortasun zantzuak antzeman dituzte eta horiek bigarren fasean baieztatzeko itxaropena du taldeak.

Arnas distres akutuaren sindromea covid-19aren konplikaziorik larriena da. Gaixo larrien % 40k baino gehiagok garatzen dute, eta distres moderatu-larria duten pazienteen % 50 hil egiten dira.

Exekutiboaren arabera, sendagai honen helburuak hiru dira: gaixoei konplikazio hori gainditzen laguntzea, heriotza-tasa murriztea eta epe ertain edo luzean birika-ehunaren kalteak murriztea.

Medikamentua egoera kritikoan dauden pazienteentzat da, eta, Fonten hitzetan, lehen etapa hau arrakastaz amaitzeak "hilkortasuna eta covid-19aren konplikazioak murrizteko esperantza ematen du". Gainera, "arlo sozioekonomikoan, agerian uzten du Euskaditik covid-19aren kontrako medikamentu berriak garatzeko egiten ari garen lana. Eta, gure sektorean, munduko abangoardian jartzen gaitu", gaineratu du.