Rosario Porto, Asuntaren ama, hilik aurkitu dute Brievako kartzelan

Brievako (Avila) kartzelako funtzionarioek Rosario Porto, Asunta Basterraren ama, hilik aurkitu dute gaur goizean, Coruñan neskatoa hiltzeagatik 18 urteko kartzela-zigorra ezarrita.

Espetxeetako iturriek jakitera eman dutenez, goizeko zenbaketan funtzionarioek presoaren falta sumatu dute, eta ziegara joan direnean hilda aurkitu dute.

Berehala, 112 telefonora deitu dute eta larrialdi zerbitzuek suspertzeko maniobrak egin dizkiote, baina heriotza baieztatu besterik ezin izan dute egin.

Portok ziega jasota zuen, eta hortaz, horrek pentsarazten du erabakia aurrez hartuta zuela, iturrien arabera.

Rosario Porto abokatua zen, eta bere alaba adoptatua hiltzeagatik zigorra betetzen ari zen espetxean. Dagoeneko 7 urte bete zituen hiru espetxetan: A Laman (Pontevedra), Teixeiron (Coruña) eta Brievan (Avila).

Ez zen lehen aldia

Beste batzuetan ere saiatu zen bere buruaz beste egiten, adibidez 2018ko azaroan. Nahiz eta ez zen egiaztatu bere burua hiltzen saiatu zenik, une horretatik aurrera suizidioei aurrea hartzeko protokoloa areagotu eta konfiantzazko beste preso batekin jarri zuten. Hilabete batzuk lehenago, 2017ko otsailean, ospitalera eraman zuten bere burua zauritzen saiatu ostean.

Hori dela eta, hainbat espetxetan suizidioaren aurkako protokoloak ezarri dizkiote.