Ayuso Sanchezekin bilduko da alarma egoeraren aurrean alternatibak bilatzeko

Isabel Diaz Ayuso Madrilgo presidentea Pedro Sanchez Espainiako Gobernuko presidentearekin batzartuko da gaur, koronabirusaren hedapena geldiarazteko Espainiako Gobernuak ezarriko duen alarma-egoeraren "alternatibak bilatzeko".

"Gaur gaueko 22:15ean Pedro Sanchez Espainiako Gobernuko presidentearekin hitz egin dut eta biharko geratu naiz. Lehen orduan Madrilgo Erkidegoan elkartuko gara alternatibak ikusteko. Gure oinarrizko neurriak funtzionatzen ari ziren eta onena izan daitezke ", idatzi du Ayusok txio batean.

Pedro Sanchez Espainiako Gobernuko presidenteak Ministroen ezohiko Kontseilua deitu du goizean Madrilgo egoera jorratzeko, eta bertan erabakiko dute alarma egoera ezarri ala ez.

Estatuko Komunikazio Idazkaritzak jakinarazi duenez, Aljeriatik itzuli eta bere taldearekin bildu ondoren, Sanchezek Ayusorekin hitz egin du bart, Madrilgo Justizia Auzitegi Nagusiak gaur bertan baliogabetu duen aginduan aurreikusitako neurriei eusteko.

Madrilgo presidenteari azaldu dionez, hiru aukera ditu: Erkidegoak neurri bereziekin agindu bat ematea; alarma egoera deklaratzeko eskatzea, Gobernuak — "Madrilgo Erkidegoarekin batera", azpimarratu dute iturriek — adieraz dezan eta neurri horiek berrets ditzan; edo Gobernuak zuzenean alarma deklaratzeko erabakia har dezan.

Moncloak azpimarratu du garrantzitsua dela adieraztea hiru aukeretako edozeinetan konfinamendu perimetraleko neurriak eta gainerako arauak "lehendik aplikatzen ziren berberak" izango liratekeela, "aldatuko litzatekeen gauza bakarra hartzen den tresna legala izango litzatekeelako", hau da, "berme juridikoa".