770 positibo berri Hego Euskal Herrian azken orduetan

Hego Euskal Herrian egindako 9.586 PCR probetan, 770 kasu positibo berri zenbatu dira azken orduetan.

Euskal Autonomia Erkidegoan (EAE) 610 positibo berri erregistratu dira PCR proba bidez azken 24 orduetan. Euskadin atzemandako kasu berri guztietatik, 370 Bizkaiari dagozkio, 106 Gipuzkoari eta 130 Arabari. Horrez gain, EAEtik kanpo bizi diren lau lagunek positibo eman dute.

Osasun Sailak ohar baten bidez jakinarazi duenez, atzo 7.780 PCR proba egin zituzten.

Atzoko egunean, gainera, 18 ospitaleratze berri izan ziren COVID-19aren ondorioz, eta 14 pertsona daude ZIUn.

Osasun Sailak astelehenean eguneratuko du udalerriei buruzko informazioa, baita R0 indizea ere.

Nafarroa

Bestalde, 160 kasu positibo berri erregistratu ditu Nafarroak egindako 1.806 PCR probetan. "Normaltasun berria" hasi zenetik positibo kopururik altuena da, eta hirugarrena PCR probei erreparatzen badiegu.

Nafarroako hiriburua eta Iruñerria dira zonalderik kaltetuenak (kasuen % 47), jarraian Tutera doa (kasuen % 21), eta, gerora, Lizarra (kasuen % 13). Adinari erreparatuta, 15 eta 29 urte artean izan dira kasu gehien (% 32), 30-44 urte bitartean, berriz, kasuen % 23, eta kasuen erdia baino gehiago 15 eta 44 urte bitarteko tarteari dagokio.

Ez da hildakorik egon foru erkidegoan; beraz, 532 izaten jarraitzen du hildakoen kopuruak. Erietxeetako egoerari dagokionez, "egonkor" dago. Sei ospitaleratze berri izan dira, eta horietako lau 65 urtetik gorako pertsonei dagokie. Gainera, COVID-19a duten 50 pertsonak ospitaleratuta jarraitzen dute, bost ZIUn eta beste hiru euren etxeetan.