Bizkaiko kostan hondoratutako ontzi bateko zortzi arrantzaleak erreskatatu dituzte

Itsas Salbamenduak Marhvin arrantza-ontziko zortzi tripulatzaileak erreskatatu ditu goizaldean Bizkaiko kostaldetik 53 miliara hondoratu ostean, Galea lurmuturraren parean. Ontzia Santoñakoa (Kantabria) zen.

Itsas Salbamenduko iturriek jakitera eman dutenez, itsasontziko tripulazioak 23:00ak aldera jakinarazi die erreskate zerbitzuei arrantza-ontzia hondoratzen ari zela kroskoan egindako zulo batetik ura sartzen ari zitzaielako, eta Salvamar Alcyone erreskate-ontzia bidali dute bertara.

Aurretik, Santoñan basea duen beste arrantza-ontzi bat (Nuevo Salvador Padre) bertaratu da hari laguntzeko, eta Marhvin ontziko bost tripulatzaile hartu ditu; beste hirurak ontzian sartzen ari zen ura ateratzen geratu dira.

Azken hiru arrantzale horiek ere ontzia utzi behar izan dute azkenean, eta Nuevo Salvador Padre ontzitik Itsas Salbamenduko ontzira eraman dituzte. Osasun egoera onean zeuden guztiak, eta gaur goizeko lehen orduan iritsi dira Santoñako portura.