Gizartea -
Zaldibar
Verterrek dio ikerketa topografikoa aztertzear zela luizia gertatu zenean
Teknikariek "ezohiko egoera bat" atzeman zutela aitortu du, baina ez omen zuten “berehala luizia gertatzeko zantzurik” aurkitu.
agentziak | erredakzioa
Verter Recycling Zaldibarko zabortegia kudeatzen duen enpresak ziurtatu du otsailaren 7an zabortegiaren ikuskapen teknikoaz arduratzen den taldearekin pitzadurei buruzko ikerketa topografikoaren emaitzak aztertu behar zituela, "ezusteko luizia" gertatu eta egun batera. Bilera horrek "neurriak hartzeko eta Eusko Jaurlaritzari informazioa emateko diagnostiko argi bat” egiteko izan behar omen zuen.
Enpresak azpimarratu duenez, txosten topografikoan parte hartu zuten teknikariek "ezohiko egoera bat" identifikatu zuten, baina ez zabortegia "berehala erortzeko zantzurik", otsailaren 6an bi langile lurperatuta utzita gertatu zen bezala.
Eusko Jaurlaritzaren aldetik, Elena Moreno Ingurumen sailburuordeak joan den astelehenean adierazi zuenez, Verter Recyclingek ez zion "inolako txosten topografikorik" helarazi, pitzadurak agertzeagatik kolapsoa izateko arriskua zegoela eta lanak geldiaraztea aholkatzen zuenik. Morenok esan zuenez, Ingurumen Sailak esku hartuko zuen horrelako zerbaiten berri izan balu, eta "ez zen gertatu enpresak, informazio hori administrazioari helarazi behar zionak, ez zuelako jakinarazi".
Bestalde, Verter Reciclingek Europa Press albiste agentziari igorritako ohar batean adierazi duenez, "arreta handiz" jokatu zuen zabortegian izandako "zorigaiztoko istripuaren" aurreko egunetan (otsailaren 6an, osteguna, arratsaldeko hiruretan gertatu zen istripua), eta, azaldu duenez, arrakalak 3. astelehenean identifikatu zituzten.
Horri dagokionez, Zaldibarko zabortegia kudeatzen duen enpresak azpimarratu du "puntualki" jakinarazi dizkiola Eusko Jaurlaritzako Ingurumen Sailari hiru hilean behin egin diren txosten topografiko guztiak, urtero egiten diren Ingurumena Zaintzeko Programen bidez. "Jarduera hori Eusko Jaurlaritzako Ingurumen Saileko ordezkariek egiaztatu dute", gaineratu du.
Dena dela, enpresak berretsi du "txosten eta gomendioak ikusita, luizia aurreikusezina" zela, "teknikari bakar batek ere ez baitzuen ohartarazi arrisku hori zegoenik".
