Mosaikoa egin dute Zaldibarren, Alberto eta Joaquin desagertu eta 151 egunera

Berrogeita hamar lagun inguru bildu dira Zaldibarko plazan Joaquin Beltran eta Alberto Sololuze oroitzeko. Bost hilabete bete dira luizia gertatu zenetik, eta bertan lurperatuta jarraitzen dute.

Herritarrek 151 zenbakia erakusten zuen mosaiko bat egin dute bi langileen oroimenez, lurpean daramatzaten egunak gogora ekarriz.

Zaldibar Argitu plataformak deitu du elkarretaratzea, eta herriko plazan egin da, isilik eta "Alberto, Joaquin, osasuna, erantzukizunak" zioen pankarta batekin.

Gaizka Zaparte plataformako kideak esan duenez, ekintza horrekin bost hilabeteren ostean langileen gorpuak oraindik ez direla agertu salatu nahi izan dute.

Halaber, zabortegiak jarraitzeak "desastrea" eragin ondoren ez dela dimisiorik egon salatu dute, nahiz eta "bistakoa den Eusko Jaurlaritzak ardura duela zabortegiaren kudeaketan" eta bertako "irregulartasunak ezagun" zituen.