Hego Euskal Herriko haur-eskola publikoak, gaurtik aurrera irekita

Hego Euskal Herriko haur-eskola publikoek gaur zabalduko dituzte ateak, hiru hilabete baino gehiagoko etenaldiaren ondoren. Hala ere, edukiera asko mugatuta eta lantokira joan beharra duten gurasoen seme-alabak baino ez dituzte hartuko.

Berez, % 60ko edukierarekin zabal daitezke, baina % 15 inguru izango dira Araban, Bizkaian eta Gipuzkoan gaurtik haur-eskolara itzuliko diren 0-3 urteko umeak. Izan ere, telelanerako aukerarik ez duten gurasoek edo ziurtagiri bidez kontziliazio arazoak dituztela frogatu dituztenek baino ezingo dituzte haurrak zentrora eraman.

Segurtasuna zaintzeko protokolo zorrotzak jarriko dituzte, eta hezitzaileek eta haurren senideek astean bitan jakinarazi beharko dute ez dutela koronabirusaren zantzurik. Eskolara modu mailakatuan iristea, haurrei tenperatura hartzea eta etxetik jostailu propiorik ez eramatea dira zentro batzuetan hartu dituzten neurrietako batzuk.

Eusko Jaurlaritzaren Hezkuntza Sailak martxan jarri duen kontingentzia-plana uztaila bukaera artekoa da, eta, hori dela eta, sindikatuak kexu dira, irailerako zer asmo dagoen ez dakitelako.

Nafarroan ere, gaurtik daude zabalik haur-eskolak. Kasu horretan, asko jota 8 haur egongo dira urtebete baino gutxiagoko geletan; 12 haur, urte bat eta bi artekoetan; eta 16 haur, bi eta hiru urte artekoetan. Metro eta erdiko tarteak bermatzeko ahalegina egin beharko dute hezitzaileek, eta pandemian orokortu diren higiene neurriak hartu.