Hasi da 3 fasea: Araba, Bizkaia eta Gipuzkoa artean mugitzea baimenduta dago jada

Hego Euskal Herria deseskalatze prozesuaren 3 fasera igaro da jada, eta, astelehen honetatik aurrera, autonomia erkidegoek "erabateko gobernantza" berreskuratu dute. Halaber, probintzien arteko mugikortasunari buruzko neurriak hartzea eta "normaltasunera" noiz itzuli erabakitzea erkidegoen esku geratu da.

Testuinguru horretan, Araba, Bizkaia eta Gipuzkoa artean zirkulazio askea baimendu du Eusko Jaurlaritzak, baina oraindik ez dago baimenduta EAErekin mugan dauden autonomia erkidegoekiko joan-etorriak.

Horrela, Iñigo Urkullu lehendakariak Kantabria, Nafarroa eta Errioxako presidenteekin akordioak lortzeko asmoa du, ekainaren 15ean normaltasun berriari ekin ahal izateko.

Espainiako Gobernuak, ordea, oraindik ez du baimendu fase berean dauden autonomia erkidego mugakideen arteko zirkulazioa, eta ekainaren 22ra arte itxaroteko eskatu du, alegia, gaur egun indarrean dagoen alarma-egoera bertan behera geratu arte.

Urkulluk horren harian azpimarratu duenez, "herritar, familia eta negozio asko eskatzen ari dira urrats hori aurreratzea", izan ere, "une erabakigarri honetan, merkataritza, turismoa, logistika eta esportazioak suspertzen lagunduko du".

Erkidegoen arteko mugikortasunari dagokionez, Maria Chivite Nafarroako Gobernuko presidenteak esan du lehendakariarekin eta Errioxako zein Aragoiko gobernuekin hitz egingo duela, aukera hori martxan jartzea denen artean adosteko. Ekainaren 15eko astean izan daitekeela gaineratu du, betiere epidemiaren bilakaeraren arabera.

Halaber, Miguel Angel Revilla Kantabriako presidentea ere mugakide diren autonomia erkidegoen arteko zirkulazioa ahalbidetzearen alde dago. Ildo horretatik, ekainaren 15etik aurrera, Kantabriaren eta Euskadiren arteko joan-etorriak baimenduta egongo direla ziurtzat jo du Revillak. Hala, herritarrentzat "albiste ona" izango dela esan du, eta asteartean baimenduko da, bere ustez, bi autonomia erkidegoek Espainiako Gobernuko Osasun Ministerioari eskaera egindakoan.

Kantabriak eta Euskadik duela egun batzuk egindako eskaera da, eta, Revillak azpimarratu duenez, "oso garrantzitsua da eskualdeko turismoarentzat; izan ere, ez da gauza bera mugikortasuna 21ean eta 15ean baimentzea, astebeteko alde hori herritarrak hartzeko prestatzen joateko aukera ematen duelako".

Eusko Jaurlaritza pozik agertu da

Eusko Jaurlaritzak pozik hartu du Araba, Bizkaia eta Gipuzkoa 3 fasera pasatzeko eskaria onartu izana, eta orain epidemia "zaintzeko eta kontrolatzeko garaia" dela esan du.

Osasun Sailak ohar batean adierazi duenez, "aurrerapauso hau azken hilabeteetan osasun sektoreko eta funtsezko jardueretako milaka profesionalek egindako lanaren ondorioa da".

COVID-19aren bilakaera positiboa dela azpimarratu du, kutsatze kopuruak behera egin duelako eta, ondorioz, ospitaleetan presioa baretu delako. "Pandemiaren unerik zailenean ospitaleetan erantzuteko gai izan gara sare lanari esker", erantsi du.

Egoera hobera egiten ari bada ere, orain arteko lana ez ahazteko eta prebentzio neurriak zorrotz betetzen jarraitzeko deia egin die Osasun Sailak herritarrei. Ildo horretan, pertsonen arteko bi metroko distantzia errespetatzea, maskara erabiltzea eta eskuak sarritan garbitzea ezinbestekoa dela gogoratu du.

Nafarroako Gobernuak zuhurtzia eskatu du, aurrera egin arren

Chivitek ere pozik hartu du 3 fasera igarotzeko egin zuen eskaera onartu izana, baina zuhurtziaz eta arduraz jokatzen segitzea ezinbestekotzat jo du, "prozesu honetan atzera ez egiteko". Aurreko fasean bezala, oraingoan ere araudi orokorrak baino murrizketa gehiago ezarriko dituzte Nafarroan.

Chivitek esan du agertokia "positiboa" dela, baina uda gainean dugula eta hori mugarri bat izango dela iritzi dio, "jarduera sozialak areagotu egiten direlako eta aurtengo uda konfinamendu gogor baten eta egoera pertsonal konplikatuen ostean iritsi delako".

Hori dela eta, udalerrietako festak eta, nola ez, sanferminak izan ditu hizpide Chivitek. Nafarroako Gobernuak udalerrien eta kontzejuen federazioarekin aurtengo festak bertan behera uztea hitzartu zuela ekarri du gogora, eta familia, lagun edo kuadrillen arteko topaketak saihesteko deia egin die herritarrei.  

"Jaietako programa ofizialik ez egotearen helburua mota guztietako jaiak saihestea da, jende pilaketarik egon ez dadin. Ez dugu esaten aisialdiari uko egin behar zaionik. Baina badaude elkartzeko eta gozatzeko beste modu asko. Arduraz jokatzea eta pertsonen arteko distantzia eta higiene neurriak betetzea soilik eskatzen dugu", azaldu du.

Testuinguru horretan, Iruñeko Udalarekin sanferminei buruz hitz egingo duela iragarri du, jaiak bertan behera utzi bazituzten ere, jende pilaketak eta balizko kutsatzeak ez izateko. "Sanfermin onenak 2021ekoak izango dira", adierazi du.

Kontuan izan osasun agintariek koronabirusaren aurrean eman dituzten aholkuak. Albiste faltsuak zabaldu dira; beraz, agintariek emandakoei bakarrik egin kasu. Gaitzaren sintomarik baduzu eta EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu COVID-19a ez hedatzeko modurik eraginkorrena eskuak sarri garbitzea dela; ahoa estaltzeko maskarak derrigorrezkoak dira garraio publikoan, baita kalean eta leku itxietan ere, bi metroko segurtasun-tartea bermatu ezin bada.