Gizartea -
Koronabirusa
Mikel Sanchez: "Ezin dugu arreta galdu, datu onak ditugun arren"
Eusko Jaurlaritzako Osasun Saileko plangintza zuzendariak ohartarazi duenez, "atzera bueltatzea oso gogorra" izango litzateke. Bestalde, faseen iraupena astebetera mugatzearen alde agertu da.
Radio Euskadi | Erredakzioa
Euskadin koronabirusak eragindako egoeraren "bilakaera positiboa" eta "normalizazioa" onartu du Mikel Sanchez Eusko Jaurlaritzako Osasun Saileko plangintza zuzendariak Radio Euskadiko Boulevard albistegian, hildakorik gabeko lehen egunaren ostean. "Zaintza aktiboko fasean gaude", azpimarratu du Sanchezek; izan ere, "ez gara pandemiaren aurreko normaltasunera itzuliko". "Ezin dugu arreta galdu, eta bereziki adi egon behar dugu", nabarmendu du.
Zainketa intentsiboetako unitateetan, COVID-19aren eraginez okupatutako ohe kopuruak behera egin du azken egunotan, eta, atzo (maiatzak 24) 33 ohe baino ez zeuden okupatuta. Horrek, ospitaleetako "ohiko jarduera berreskuratzea" ahalbidetzen du. "Duela aste batzuetatik udazkenera eta negura begira ari gara lanean, agerraldi berririk izanez gero ondo baino hobeto prestatuak egon gaitezen". Kontsulten zain dauden gaixoei "pazientzia" eskatu die, asistentzia-jarduera mugatu ondoren. "Beldurrak baldintzatu du zentroetara joatea", esan du Osasun Saileko plangintza zuzendariak. "Gaixoei deitzen ari gara kontsultetara joan daitezen, baina tresna telematiko gehiago erabiliko ditugu".
Deseskalatze prozesuan aurreikusitako faseen iraupena astebetera mugatzen ditugu? "Espainiako Gobernuko Osasun Ministerioa aztertzen ari den aukera bat da". Horren harira, Sanchezek esan du "posible izan litekeela, datuen arabera. Berme handienarekin hartu beharreko erabakiak dira, egoera aztertu eta horren ondorioak aurreikusi ondoren". Euskadin alarma-egoera bertan behera uzteko moduan gaude? "Gure bilakaera oso ona izaten ari da. Horrela jarraituz gero, egoera normalizatzera iritsi beharko dugu ".
"Gipuzkoan badira egun batzuk ez direla kasurik atzeman, eta transmisioa ere oso baxua da", adierazi du Mikel Sanchezek, "batez ere familia ingurunean gertatzen dira". Zaintza eta kontrol fasean "gaitza modu goiztiarrean identifikatu nahi dugu, eta gaixoen kontaktuetarako proba diagnostiko bat bermatu". Sanchez "esku artean dugunaren perspektiba galtzeaz kezkatuta" ageri da, "atzera bueltatzea oso gogorra" izango litzatekeela ohartaraziz.
Jatorrizko informazioa Radio Euskadik landu eta eitb.eus-ek itzuli du:
14:49
