Gizartea -
KORONABIRUSA
19 hildako EAEn eta 12 Nafarroan azken orduetan COVID-19aren ondorioz
"Pazienteak artatzeko jarduerari eta alor epidemiologikoari erreparatuta, beheranzko joera" baieztatzen dute kutsatu berrien eta hildakoen datuek, Osasun sailburuaren iritzian.
EITB.EUS | AGENTZIAK
COVID-19ak eragindako pandemiaren ondorioz, 19 pertsona hil dira EAEn eta beste 12 Nafarroan azken orduetan. Gainera, EAEn 352 positibo gehiago zenbatu dituzte, Nekane Murga Osasun sailburuak larunbat honetako agerraldian jakinarazi duenez. Horren hitzetan, "pazienteak artatzeko jarduerari eta alor epidemiologikoari erreparatuta, beheranzko joera" baieztatzen dute kutsatu berrien eta hildakoen datuek.
Hortaz, koronabirusaren pandemia hasi zenetik, EAEn 14.132 pertsona daude kutsatuta, eta beste 1.212 hil dira COVD-19arekin. Erietxetan ospitaleratuta egon diren edo dauden lagunak 6.375 dira, atzo baino 60 gehiago.
Zainketa Intentsiboko Unitatean, berriz, 525 pertsona daude, atzo baino zazpi gehiago. Gaitza gainditu dutenen kopuruari dagokionez, 8.941 dira Euskal Autonomia Erkidegoan.
Ostiral arratsaldeko 20:00ak arte bildutako datuen arabera, guztiz sendatutako edo mediku alta jasotako pertsonak 8.941 dira. Gaitza detektatzeko 4.968 PCR test eta 4.441 test azkar egin dira ostiralean, egun bateko kopururik handiena, eta guztira 78.896 egin dira orain arte. Hamar probatik zazpik eman dute positibo.
Herrialdeka, Araban 3.551 kasu positibo zenbatu dira (aurreko egunean baino 98 gehiago), eta horietatik 146 ospitaletan daude; Bizkaian 8.025 pertsona daude kutsatuta (197 gehiago), horietatik 448 ospitaleratuta; Gipuzkoan 2.556 positibo zenbatu dira (57 gehiago), horietatik 175 ospitaletan. Halaber, epidemia hasi zenetik, Araban 332 lagun hil dira, Bizkaian 642 eta Gipuzkoan 238.
Nafarroa
Bestalde, Nafarroako Foru Erkidegoan 94 kasu berri izan dira, aurreko egunean baino % 1,8 gehiago. Epidemia hasi zenetik konfirmatutako kutsatze kopurua 5.274koa da. Ostiral honetako 20:00ak arte 12 hildako gehiago izan dira Nafarroan, guztira, 429. Gaixotasuna gainditu dutenen kopurua 1.737koa da, aurreko egunean baino 185 pertsona gehiago.
Hildakoen % 70,2 erietxetan ospitaleratuta zeuden, eta gainerako % 29,8, ordea, ospitaletik kanpo jazo dira. Hildakoen batez besteko adina 83 urtekoa da.
Datuak Estatu mailan
Hildako kopuruari dagokionez, zertxobait gora egin du larunbat honetan Espainiar Estatu mailan: 378 hildako gehiago izan dira, beraz, 22.902 lagun hil dira guztira, Espainiako Osasun Ministerioak jakitera eman duenez. Ostiralean 367 hildako gehiago izan ziren, aurreko egunean baino 11 hildako gehiago.
223.759 kutsatu daude Estatu osoan, aurreko egunean baino 2.944 kasu gehiago. Gaitza gainditu dutenak, ordea, 95.708 dira, eta horietatik 3.353 azken 24 orduetakoak dira.
Autonomia Erkidegoei erreparatuta, COVID-19agatik hildako kopuru gehienak ditu Madrilek (7.848 hildako); jarraian doaz Katalunia (4.498); Gaztela-Mantxa (2.292); Gaztela eta Leon (1.639); EAE (1.212); Valentzia (1.172); Andaluzia (1.131); Aragoi (709); Nafarroa (429); Extremadura (416); Galizia (388); Errioxa (311); Asturias (239); Kantabria (182); Balear Uhartea (174); Kanaria Uhartea (130); Murtzia (126); Ceuta (4); eta Melilla (2).
