Gizartea -
Koronabirusa
Gel desinfektatzaileak gehienez 0,021 euroko prezioa izango du mililitro bakoitzeko
Horrela, herritarrei gomendatutako produktuetarako sarbidea bermatu nahi da, koronabirusa hedatzea saihesteko. Izan ere, higiene neurriak hartzea da gaitzari aurre egiteko modurik eraginkorrena.
Agentziak | Erredakzioa
Gelak eta soluzio hidroalkoholikoek 0,021 euroko gehieneko salmenta-prezioa izango dute mililitro bakoitzeko ostiral honetatik aurrera, Espainiako Gobernuko Osasun Ministerioaren agindua indarrean sartu ondoren. Horrez gain, erabilera bakarrekoak diren maskara kirurgikoen prezioa 0,96 eurokoa izango dela ezartzen du agindu horrek.
Zehazki, Sendagaien eta Osasun Produktuen Prezioen Ministerio Arteko Batzordeak ezarri du maskara kirurgikoen zein gel desinfektatzaileen gehieneko prezioa publikoarentzako salmentarako. Horrela, herritarrei gomendatutako produktuetarako sarbidea bermatu nahi da, COVID-19 gaitza hedatzea saihesteko. Testuinguru horretan, Estatuko Aldizkari Ofizialak (EAO) erabakitako gehieneko zenbatekoak argitaratu ditu jada.
Hortaz, Sendagaien eta Osasun Produktuen Batzordeak ezarritako agindu horren arabera, aldi baterako baimendutako gelek edo soluzio hidroalkoholikoek gehienez 0,021 euroko prezioa izango dute mililitro bakoitzeko, 150 mililitro arteko ontzien kasuan.
Prezioa 0,018 euro/ml-ra jaisten da 150 eta 300 ml artean dituzten ontzien kasuan, eta 0,015 euro/ml-ra 300 ml eta litro bat artean dituztenen kasuan.
Batzorde horren hurrengo bileran, aldi baterako baimendutako maskara higienikoek eta antiseptikoek izango duten gehieneko salmenta-prezioak erabakiko dira, ekoizpen-kostuei buruzko informazio gehiago izan ondoren, EAOk azaltzen duenez.
