EHUren testarekin egunean 500 eta 1.000 proba bitartean egitea espero dute

Euskal Herriko Unibertsitateak (EHU) COVID-19 gaitza atzemateko garatu duen testarekin egunean 500 eta 1.000 proba bitartean egitea espero dute osasun arloko adituek, oraindik gainditu beharreko baliozkotze kliniko gehigarri baten falta den arren, Madrilgo Carlos III Osasun Institutuak koronabirusaren diagnostikorako PCR testak egiteko baimena eman ondoren, Eusko Jaurlaritzako Osasun Sailak eta EHUk jakinarazi dutenez.

Zehazki, "ikerketa oinarri hartuta" Euskadin koronabirusari aurre egiteko "elkarlanerako bide bateratua adostu" behar dela azpimarratu dute Osasun Sailak, EHUk eta Osakidetzak elkarrekin kaleratu duten ohar batean.

Osasun Sailak eta EHUk nabarmendu dutenez, lortutako gaitasunak "ikertzaileek erabilitako teknika ona aitortzen du". Hala ere, proba horiek pazienteetan erabili ahal izateko beste balidazio kliniko bat egitea beharrezkoa dela zehaztu dute.

Teknika hori ikerketa laborategi baten ikuspuntutik gaituta dago, baina "kutsatutako pertsonengan baliagarri izateko egiaztapen gehiago egitea falta da, ohiko prozesua baita osasun arloan teknika bat erabili ahal izateko", azaldu dute.

Hori dela eta, EHUko ikertzaileek eta Osakidetzako laguntzako langileek "estu" jarraituko dute lanean datozen egunetan, proba "ahal bezain laster eskura izateko", eta, ondoren, horiek erabiltzeko aukera desberdinak aztertzeko, "betiere asistentziaren esparruko aterkipean, eta hori lankidetza-hitzarmen batean islatuta geratuko da".

Azken egunetan egindako bilera teknikoek EHU buru duen ikerketa-proiektua aztertzeko balio izan dute, COVID-19 gaitza detektatzeko proba bat prest jartzearekin lotuta. Bi aldeak bat etorri ziren Carlos III.a Institutuak trebakuntza lortzea "albiste ona" dela Euskadiko ikerketa-eremuarentzat, zorroztasuna eta aintzatespena ematen diolako.