Garraio publikoan maskarak erabiltzea aholkatu du Espainiako Gobernuak

COVID-19aren hedapenari aurre egiteko, garraio publikoa erabili behar duten herritarrei maskarak erabiltzea aholkatu die Espainiako Gobernuko Osasun Ministerioak.  Salvador Illa Osasun ministroak aurreratu duenez, astelehenetik aurrera, tren eta metro geltokietan, jende gehien pilatzen den guneetan, maskarak banatuko dituzte. Noiz eta nola banatuko dituzten ez dute zehaztu.

Ministerioak zehaztu duenez, lantokira oinez, bizikletaz edota autoz doazen langileek ez dute maskara eraman beharrik, "kasu horietan metro eta erdiko edota bi metrotako tartea mantentzea posible baita".

Pedro Sanchez Espainiako presidenteak martxoaren 28an iragarritako dekretuaren ondoren, oinarrizkoak ez diren lan-jardunak bi astez geldirik egon eta gero, berriro martxan hasiko dira astelehenean, eta jendearen joan-etorri handia espero da, besteak beste, garraio publikoan.

Gaixotasunak Kontrolatu eta Prebenitzeko Europako Zentroak maskarak jendaurrean erabiltzea babestu zuen atzo, bai COVID-19 gaitza duten eta sintomak dituztenek, baita sintomarik gabekoek ere, bereziki itxitako guneetan eta leku jendetsuetan; hala nola,  dendetan, merkataritza-guneetan edo garraio publikoetan.

Europatik helarazitako aholku horren ondoren erabaki du Osasun Ministerioak maskarak banatzen hastea, jende pilaketa egon daitekeen lekuetan, eta garraio publikoan maskarak erabiltzea aholkatzea.

Illa ministroak gogoratu duenez, orain arteko aholkuei gehitu behar zaie maskarena. Hau da, eskuak behin eta berriz garbitzea, pertsonen arten metro eta erdiko tartea mantentzea eta eskuekin kontaktuan dauden gainazalak ahal bezain ondo garbitzea dira oinarrizko neurriak. 

"Maskarak jendaurrean erabiltzeak infekzioaren hedapena murrizteko kontrol-baliabide gisa balio lezake", esan zuen atzo Gaixotasunak Kontrolatu eta Prebenitzeko Europako Zentroak.