Galdakaoko Ospitaleko bi solairutako langileak koarentenan jarri dituzte

Larrialdietako langile batzuk ere isolatu dituzte. Ospitale horretan izan da koronabirusak eragindako lehen heriotza Euskal Herrian.

Hainbat neurri hartu dituzte euskal ospitaleetan. EiTBren bideo batetik hartutko argazkia.

EiTB.EUS

publikatuta: 2020/03/05 15:28 (UTC+1)

azken eguneratzea: 2020/06/08 09:13 (UTC+2)

Eusko Jaurlaritzaren Osasun Sailak Galdakaoko Ospitaleko bi solairutako langileak eta Larrialdietako zerbitzuko hainbat koarentenan jartzea erabaki du, koronabirusa ez kutsatzeko, Euskadi Irratiak jakinarazi duenez.

Ospitale horretan izan da COVID-19 gaixotasunak eragindako lehen heriotza Euskal Herrian; hain zuzen ere, hildakoa, gaixo kronikoak pairatzen zituen 82 urteko gizon bat bera, asteazkenean zendu zen bertan.

Une honetan 30 lagun daude koronabirusak kutsatuta Euskal Herrian, eta horietatik lau larri daude (hiru EAEn, eta beste bat Nafarroan): 20 kasu daude Araban, bost Bizkaian, bi Gipuzkoan, bi Nafarroan, eta bat Lapurdin. Halaber, Txagorritxuko Ospitalean lan egiten duten eta Errioxan eta Burgosen bizi diren beste bi lagunek ere positiboa eman dute.

Eguerdian prentsaurrekoan Nekane Murga Osasun sailburuak zehaztu duenez, EAEn isolatuta dauden osasun-langilerik gehienek Araban egiten dute lan; hori bai, batzuk hasi dira jada lanpostuetara itzultzen.

Murgak ez du esan Osakidetzako zenbat lagun dauden egoera horretan. Asteazkenean 100 bat ziren.

Kontuan izan osasun agintariek koronabirusaren aurrean eman dituzten aholkuak. Albiste faltsuak zabaldu arren, agintariek emandakoei bakarrik egin kasu. Zalantzarik baduzu edo gaitza hedatu den gune batera bidaian joan ostean sintomarik baduzu, Osasun Batzordearen telefonora dei dezakezu: 900 20 30 50 (EAE) eta 948 290 290 (Nafarroa). Gogoratu COVID-19 gaitza ez hedatzeko modurik eraginkorrena eskuak sarri garbitzea dela; ahoa estaltzeko maskarak bakarrik dira gomendagarriak sintomak badituzu edo adineko pertsonekin edo immunodeprimituekin harremanetan bazaude.

Hau zure interesekoa bada, baliteke beste gai hauek ere izatea

Osakidetza Galdakao bideoak Azken ordukoa Bizkaia Eusko Jaurlaritza berriak Euskal Autonomia Erkidegoa albisteak Gaixotasunak bideoak Gizartea Eguneko albisteak Albisteak Osasun albisteak gaur Sendagileen albisteak Erizainak azken ordukoa Koronabirusa olatu berria Galdakao-Usansolo Ospitalea albisteak

Galdakaoko Ospitaleko bi solairutako langileak koarentenan jarri dituzte

Esteka kopiatuta