Gizartea -
Eguraldia
Abisu horia ezarri dute gaur kostaldean, itsasaldeko arriskuagatik
Nabigaziorako lehen bi itsas milietan ezarritako abisuaz gain, beste abisu hori bat ezarriko dute itsasgoran 4-5 metroko olatuak irits daitezkeelako itsasertzera.
Agentziak | Erredakzioa
Eusko Jaurlaritzako Segurtasun Sailak abisu horia ezarri du gaur, asteartea, kostaldean, itsasaldeko arriskuagatik. Nabigaziorako lehen bi itsas milietan ezarritako abisua egun osoan egongo da indarrean, izan ere, 5 metrorainoko olatuak espero dira, batez ere arratsaldean izango den itsasgoran.
Zehazki, 4-5 metroko olatuak izango dira gaur euskal kostaldean, eta, hori dela eta, abisu horia ezarri dute, eta beste abisu hori bat itsasgoran (18:00etatik 20:00etara), 4-5 metroko olatuak irits daitezkeelako itsasertzera.
Egoera hori bihar, asteazkena, errepikatuko da, 18:00ak arte; nabigaziorako abisua eta kostaldean 4 metroko olatuak izango dira. Egunak aurrera egin ahala, olatuen altuera jaisten joango da, eta 3-3,5 metrokoak izango dira gauean.
Donostiako Pasealeku Berria ibilgailuentzat itxita egongo da astearte honetan, olatuen eraginez Babes Zibilak ezarritako abisu horia dela eta.
Ibilgailuak ezingo dira Pasealeku Berritik ibili 18:00ak arte.
Atzo, haizegatik abisu horia egon zen indarrean. Hego-mendebaldeko haize zakarra ibili zen, eta Urduñan (Bizkaia) 116 km/h-ko boladak erregistratu ziren. Karrantzan eta Punta Galean (biak Bizkaian), berriz, 111 eta 104 km/h-ko ufadak izan ziren, hurrenez hurren.