Barakaldoko Udaleko agintariek soldata igo dutela salatu dute protesta batean

Berri Otxoak bazterketaren kontrako kolektiboak 2.000 txorizo pintxo banatu ditu gaur eguerdian Barakaldon, "Udalak laguntza sozialak murrizten dituen bitartean, politikariek euren soldata igo dutela" salatzeko.

San Vicente auzoko jaiak aprobetxatuz, bertan egin dute protesta hainbat gizarte eragilek 'No hay pan para tanto txorizo' lelopean.

Berri Otxoak kolektiboa izan da antolatzaile nagusia, eta taldeko bozeramaileek salatu dute 2020ko aurrekontuetan "sozialistek eta jeltzaleek Amaia del Campo alkatearen soldata %4,2 igotzea" erabaki dutela, "92.184 eurora igoz". "Neurriak mesede egiten dio bazkide duen Alfredo Retortillo sozialistari ere, zinegotziei eta politikarien aholkulariei" gehitu dute.

Izan ere, "EAJk eta PSEk 1,9 milioi izendatu dituzte politikari liberatuentzat, aholkularientzat eta konfiantza karguentzat, larrialdiko laguntzak murriztu dituzten bitartean. Pobrezia egoeran dauden 1.300 Barakaldoko familiarentzat, berriz, 960.000 euro bakarrik izendatu dituzte" adierazi dute.