Gizartea -
INDARKERIA MATXISTA
3.100 emakumeri eraso egin zieten bikotekide eta bikotekide ohiek 2019an Euskadin
Biktima kopurua % 3,65 igo da 2018tik 2019ra. Nabarmentzekoa da, gainera, askatasun sexualaren kontrako delituak %9,6 hazi direla aurreko urtearekin alderatuz gero.
AGENTZIAK | ERREDAKZIOA
3.098 emakumek bikotekide edo bikotekide ohien erasoak jasan zituzten 2019an Euskadin. 2018an 2.989 biktima izan ziren, eta ondorioz, biktima kopuruak % 3,65 egin du gora, Emakundek bildutako Eusko Jaurlaritzako Segurtasun Saileko datuen arabera.
Gainera, beste 899 emakumek familia barruko indarkeria (bikotekide edo bikotekide ohiak ez diren senideena) jasan zuten iaz. %3,3 egin du gora indarkeria mota horrek ere, 2018an 870 biktima izan baitziren.
Azkenik, 422 emakumek sexu askatasunaren aurkako delituak salatu dituzte Euskal Autonomia Erkidegoan, aurreko urtean baino % 9,6 gehiago.
Guztira, 4.419 emakumek salatu dute hiru indarkeria mota horien biktima izan izana 2019an (704 Araban, 2.372 Bizkaian eta 1.343 Gipuzkoan).
Lurraldeka, sexu askatasunaren aurkako delituek nabarmen egin dute gora Bizkaian (2018an baino %23,3 kasu gehiago), familia barruko indarkeria kasuak, berriz, % 31 gehitu dira Araban eta bikotekideek edo bikotekide ohiek egindako indarkeria kasuek % 5,25 egin dute gora Araban.
