Itsasadarreko pantalan proiektua gelditzea eskatu du giza kate batek Plentzian

Plentziako (Bizkaia) Itsasadarrean pantalanak zabaltzeko eta erregai-hornigailu bat eraikitzeko proiektua gelditzea eskatu du giza kate batek igande honetan. Protesta SOS Itsasadarra plataformak antolatu du. Eusko Jaurlaritzako Portu eta Itsas Gaietarako Zuzendaritzak eta Euskadiko Kirol Portuek (EKP) bultzatu dute egitasmoa.

Plataformaren hitzetan, "XXI. mendekoa baino XX. mendeko egitasmo bat gehiago ematen du". Pantalanak, itxiturak eta erregai-hornigailu bat jarriko dituzte, "kalte ekologiko, sozial, turistiko eta ekonomikoa" kontuan hartu gabe, erantsi dutenez.

"Klima-aldaketaren arriskuei aipamenik egiten ez diotela kezka handiarekin ikusten dugu, itsasmailaren igoera edo muturreko prozesu meteorologikoak areagotzea esaterako, Gobernu arteko Klima-aldaketa Adituek (IPCC) aurreikusi bezala; ezta karbono-aztarna ere, isuriek gure hondartza, badia eta padurei eragingo dietelako, eta baita bertan bizi diren espezieei ere", ohartarazi dute.

Plataformaren ahotan, azpiegitura "arriskutsu eta ahul" bat eraikitzea planteatzen ari dira, nahiz eta "Plentziako eta Barrikako ibaiertz zaurgarriei eragin, etorkizunean gure herrientzako eta euskal kostaldearentzako kostu ekonomikoa areagotuz klima-aldaketaren ondorioengatik".

"Gure arrantzale izaera ez du ordezkatzen eta ez du kontuan hartzen, kirol portu bihurtu nahi dute, portua duen marinel herri bat baino. Gure arima eta xarma galtzera behartzen gaitu. Gure esentzia", erantsi dute.

Azkenik, proiektu "inposatu eta ilun" bat dela salatu dute, "gauetik goizera aurrera eraman nahi dutelako herritarren iritzia kontuan hartu gabe, nahiz eta eragile aktibo eta zailduak izan, ingurumenarekin eta etorkizunarekin kezkatuta".