Gizartea -
EGURALDIA
Alerta laranja haizeagatik iganderako, euskal kostalde guztian
Bizkaiko, Gipuzkoako eta Lapurdiko kostalde guztia dago alerta laranjan, baita Nafarroako iparmendebaldea ere. 120 kilometro orduko haize ufadak ekarriko ditu 'Amelie' udazkeneko lehen borraskak.
AGENTZIAK | ERREDAKZIOA
Haize ufada indartsuak espero dira biharko itsasertzean, eta atzo alerta horia ezarriko zutela iragarri bazuten ere, Eusko Jaurlaritzako Segurtasun Sailak laranjara igo du biharko alerta maila EAEn haizegatik: 120 kilometro orduko haize ufadak aurreikusi dituzte, Amelie, udazkeneko lehen borraska sartuko baitzaigu.
Larrialdiei Aurre Egiteko eta Meteorologiako Zuzendaritzak ohar batean zehaztu duenez, gaur gauerdian alerta horia ezarriko dute, baina orduek aurrera egin ahala, asko zakartuko da eguraldia, eta goizaldeko 03:00ak inguruan alerta laranja ezarriko dute, itsasertzeko haizeegunetan.
Olatu handiak ere espero dira biharko, eta abisu horia ezarriko dute kostaldean. Adituen arabera, 6-7 metroainoko olatuak izango dira.
Haizearekin batera, euria ere egingo du, bereziki egunaren lehen partean. Arratsaldean giroa lasaiagoa izango da, eta haizeak ahultzera egingo du. Tenperatura maximoak 14-17 ºC artean geratuko dira.
Iparraldean ere alerta laranja ezarri du Meteo France agentziak haizea eta olatuak direla eta.
Nafarroan ere sentituko dute Amelieren eragina. Hala, AEMETek alerta laranja ezarri du igande gauerditik aurrera iparmendebalderako (Baztan, Bera, Doneztebe, Etxalar, Arantza...). Erdialdea, berriz, abisu horian egongo da haizeagatik gaurko 24:00etatik biharko 24:00etara.
