Villabonako ustezko erasotzailea atxilotu dute Tolosan

36 urteko gizon bat atxilotu du Ertzaintzak Tolosan, Donostia-Tolosa arteko bidea egiten ari zen autobus baten barruan gazte bati labankada bat ematea leporatuta.

Ustezko erasotzailea 14:30ak aldera atxilotu dute, Tolosan, haren etxebizitzatik gertu, eta ertzain-etxera eraman dute, Segurtasun Sailak jakitera eman duenez. Datozen orduetan epailearen aurrera eramango dute.

Erasoa goizalde honetan gertatu da, 02:04an. Donostia-Tolosa ibilbidea egiten ari zen Lurraldebuseko autobus baten barruan. Dirudienez, bi pertsona eztabaidan hasi dira, eta batek besteari zauria egin dio lepoan labana batekin.

Liskarraren ondoren, gidariak autobusa geratu du Villabonako Kale Berrian, eta ateak zabaldu ditu. Une hori aprobetxatu du erasotzaileak ihes egiteko.

Zauritutako gaztea Donostia Ospitalera eraman dute, eta Ertzaintzak ikerketa zabaldu du gertatutakoa argitzeko.