Gizartea -
Violencia machista
Donostiako tatuatzailea aske utzi dute, epaileak auziaren ebazpena eman artean
Fiskaltzak eta akusazio partikularrek akusatua behin-behinean preso mantentzea eskatu zuten. Hamabi emakumeri sexu-abusuak egin izana egotzita epaitu dute gizona.
AGENTZIAK | ERREDAKZIOA
Donostiako tatuatzailearen auzia epaiaren zain geratu da eta behin betiko erabakia hartu bitartean epaileak akusatua aske uztea erabaki du.
Hamabi emakumeri sexu-abusuak egitea egotzita epaitu dute gizona. Eraso gehienak Donostian zeukan estudioan gertatu ziren. Joan den otsailaren 8tik behin-behineko espetxealdian egon da, baina atzo aske utzi zuten.
Fiskaltzak 28 urte eta sei hilabeteko kartzela-zigorra eskatu du akusatuarentzat; defentsak, berriz, absoluzioa galdegin du.
Epaiketaren azken saioan, Fiskaltzak nahiz akusazio partikularrek gizona behin-behinean preso mantentzea eskatu zuten. Alabaina, epaileak aske uztea erabaki zuen.
EFE agentziak zabaldutako autoaren arabera, epaileak defentsaren argudioak bere egin ditu eta auzipetua jada urtebete eta zortzi hilabetez preso egon dela kontuan hartu du. Halaber, azkenean errugabetzat joko balute beretzako "ondorioak oso larriak" izango liratekeela esan du.
Epaileak erruduntzat jotzen badu, berriz, kartzelan igaro beharko duen denbora luzea izango dela ere aipatzen du autoak.
Horrez gain, epaileak gogoratzen du behin-behineko espetxealdia kautelazko neurria dela eta ezin daitekeela aurretiazko zigor gisa erabili.
