Bi gizon atxilotu dituzte Gasteizen bikotekideak kolpatu eta mehatxatzeagatik

Gasteizko Udaltzaingoak 40 eta 33 urteko bi gizon atxilotu zituen atzo, asteazkenarekin, bikotekideak kolpatu eta mehatxatzeagatik. 40 urtekoak aizkora bat erabili zuen biktima beldurrarazteko.

Udaltzaingoak ohar batean gaur jakinarazi duenez, lehen atxiloketa eguerdian egin zuten. Emakume batek 092 telefonora deitu zuen laguntza eskatzeko. Agenteak Salburua auzoko etxebizitzara heldu zirenean, kanpoaldean topatu zuten biktima. Bikotekideak eraso eta aizkora batekin mehatxu egin ziola jakinarazi zien.

Agenteek ustezko erasotzailea ere galdekatu zuten. Bi bertsioak entzunda, eta emakumeak zituen lesioak ikusita, genero indarkeriaren delitua egotzita atxilotu zuten. Gizona gaur igaroko da epailearen aurretik.

Biktima ospitalera eraman zuten lehenengo, eta Agirrelandako polizia-etxera, gero, salaketa jartzera.

Beste gizon bat, 33 urtekoa, ere atxilotu zuen Udaltzaingoak, hori ere bikotekidea kolpatu eta mehatxatzeagatik. Alde Zaharreko etxebizitza batean emakume bat laguntza eske oihuka zegoela eta, 092 telefonora deitu zuten bizilagunek. Agenteak bertara heldu zirenean, biktima, bikotekidea eta beste gizon bat topatu zituzten. Hirugarren horrek baieztatu zuenez, 33 urteko gizonak eraso eta mehatxu egin zion bikotekideari. Agenteek ustezko erasotzailea atxilotu zuten.

Biktima erietxera eraman zuten agenteek lehenengo, artatzera, eta komisariara, gero, salaketa jartzera.