Gasteiz erdiguneko eraikin bat jendez hustu dute, erortzeko arriskuan dagoelako

Gasteizko Dato kaleko 8 zenbakidun eraikina jendez hustu dute astearte honetan, Udaleko teknikariek erortzeko arriskuan dagoela egiaztatu ostean.

Eraikinaren zutabeetako bat kaltetuta dago, eta konpontzeko lanak egin bitartean bizilagunak ezingo dira etxera itzuli. Hori bai, behin-behineko neurriak hartu ostean, bizilagunei etxean sartzen utziko diete ezinbestekoak diren gauzak har ditzaten.

Zutabea konpontzeko lanak auzokideen komunitateak ordaindu beharko ditu.

Udalak jakinarazi du obra egiteko baimena ahalik eta azkarren emango duela eta kaltetuei esan die beren eskura dutela gizarte larrialdietarako zerbitzua.