Bilbo, 'iCapital 2019' saria irabazteko 12 finalisten artean

Bilbo aukeratu dute 'iCapital 2019' Berrikuntzaren Europako Hiriburuaren Saria irabazteko 12 finalisten artean, Udalak ohar bidez jakinarazi duenez. Hauek dira beste hautagaiak: Anberes, Bolonia, Bristol, Dortmund, Espoo, Glasgow, Hanburgo, Londres, Lyon, Nantes eta Rotterdam.

Europako Batzordeak ematen du 'iCapital' saria, biztanleen bizi-kalitatea hobetzeari begira berrikuntza aprobetxatzeko gaitasuna frogatu dezakeen hiriari.

Xabier Ochandiano Bilboko Garapen Ekonomiko, Merkataritza eta Enplegu Saileko zinegotziak bihar, irailak 3, asteartea, aurkeztuko du Bilboren hautagaitza Europako Batzordeko epaimahaiaren aurrean, Bruselan. Epaimahaiak, besteak beste, honako alderdi hauek hartuko ditu kontuan: hiriak berrikuntza-ekosistema ireki eta dinamikoei egiten dien ekarpena; herritarrak gobernuan eta erabakiak hartzeko prozesuetan sartzeko hartzen dituzten neurriak, eta berrikuntza hirietako erresilientzia eta jasangarritasuna hobetzeko erabiltzen duten hiriak.

Saria emateko ekitaldia irailaren 25ean egingo da. Milioi bat euroko sari nagusia jasoko du Berrikuntzaren Europako Hiriburu izendatzen duten hiriak. Horrez gain, 100.000 euroko beste bost sari emango dituzte.