Gizon bat atxilotu dute Gasteizen bikotekide ohiari erasotzeagatik

20 urteko gazte bat atxilotu du Gasteizko Udaltzaingoak urruntze-agindua zuen bikotekide ohiari erasotzeagatik eta iraintzeagatik.

Udaltzaingoak dei bat jaso du esanez Judimendi auzoan gizonezko gazte bat emakumezko gazte bati erasotzen eta iraintzen ari zitzaiola.

Patruila batek emakumea aurkitu, eta bikotekide ohiak astindu eta iraindu egin duela eta aurikularrak apurtu dizkiola esan die agenteei. Beste patruila batek gizonezkoa aurkitu du, baina erasoa ukatu du.

Hala ere, egiaztatu dute gizonezkoak urruntze-agindu bat duela emakumearekiko. Hortaz, atxilotu egin dute, baina izapideak egin ondoren aske utzi dute, Guardiako Epaitegian aurkezteko hitzorduarekin.

Horrez gain, 32 urteko beste gizon bat ere atxilotu dute bikotekide ohiarekiko urruntze-agindua hausteagatik.

Gizon bat urruntze-agindua zuen emakume bat jazartzen ari zela adierazi diete bi lekukok Alde Zaharrean zeuden udaltzainei.

Agenteek atxilotu egin dute urruntze-agindua zuela egiaztatzean.

______________________________________________________

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan, baina bai telefonoan. Beraz, ez ahaztu ezabatzea.