Osasun Ministerioak 168 listeriosi kasu zenbatu ditu Estatuan

Autonomia erkidegoek oraingoz 168 listeriosi kasuren berri eman diote Osasun Ministerioari, gehienak Andaluzian eman dira. Birus horren agerraldia La Mechá markako fabrikan prestatzen ari ziren haragian sortu zela adierazi du María Luisa Carcedo, jarduneko ministrak.

Ministrak adierazi duenez, oraingoz ikerketen helburu nagusia birusa elikagai horren prestatze-prozesuaren zein etapatan zabaldu zen identifikatzea da. Hala ere, adierazi duenez, Sevillan kokatuta dagoen Magrudis fabrika itxita dago jada, eta merkatutik atera dira bertan prestatzen ziren gainerako produktuak.

Gantxigor andaluziarra, jerezko solomoa, solomoa pimenton erara eta etxeko solomoa atera dira merkatutik, hain zuzen ere. Produktu hauen gehiengoa Andaluzian banatu zen, eta ehuneko txikiago batean Madril eta Extremaduran.

Osasun Larrialdi eta Alerten Koordinazio Zentroak, Osasun Ministerioak eta Andaluziak helarazitako informazioaren arabera, 161 listeriosi kasu baieztatu dira. Kasuen gehiengoa Sevillan izan da (131).

Azken orduetan 29 pertsona gehiago ospitaleratu dira komunitate horretan, eta horrenbestez 82 dira birus horrengatik ingresatuta dauden gaixoak. Horien artean 28 emakume haurdun daude, atzo baino bost gehiago, eta hiru pertsonek Zainketa Bereziko Unitatean ingresatuta jarraitzen dute.

Espainiako Estatuak Europar Batzordeari jakinarazi dio kutsatutako haragia Estatu espainiarrean bakarrik saldu zela eta jada jarri direla beharrezko protokoloak abian.