Barneko Mediku Egoiliarren % 10,5 postu gehiago izango dira 2020an, 453 EAEn

Espainiako Osasun Ministerioak eta autonomia erkidegoek Barneko Mediku Egoiliarren (BAME) plaza kopurua % 10,5 handitzea adostu dute 2020. urteko deialdiari begira. Guztira, Barneko Mediku Egoiliarren 7.512 postu izango dira, horietatik 453 Euskal Autonomia Erkidegoan (% 1,6 gehiago).

Postu horietako 2.205 familia eta komunitateko medikuntzara bideratuko dituzte.

Datorren urtean, osasun arloko formakuntzarako postuak —Medikuntza, Erizaintza, Farmazia, Psikologia, Biologia, Kimika eta Fisika— 9.539 izango dira, aurreko urtean baino % 13,5 gehiago eta duela bi urte baino % 18,6 gehiago.

Bestalde, azterketa eredua aldatu egingo dute. 2020tik aurrera ordubete gutxiago iraungo du azterketak (bost ordukoa izatetik laukoa izatera igaroko da), eta galdera kopurua ere murritzagoa izango da (225 galdera izan beharrean, 175 izango dira, eta 10, erreserban).