Emakume batek salatutako sexu-erasoaren aurkako elkarretaratzea egin dute Beasainen

Ertzaintza sexu-eraso bat ikertzen ari da Beasainen (Gipuzkoa) biktimak jarritako salaketaren ostean, Eusko Jaurlaritzaren Segurtasun Sailak jakitera eman duenez. Erasoa bart eta herriaren erdigunean, udaletxetik gertu, gertatu dela salatu du emakumeak.

Aitor Aldasoro alkateak baieztatu duenez, gizon batek emakume bat bortxatu du, ostiral gauean herriaren erdigunean, udaletxetik gertu. Esprai bat erabili zuen gizonak neska lokartzeko. Ertzaintza erasotzailearen bila ari da.

Erasoa gaitzesteko elkarretaratzea deitu du Beasaingo Udalak, talde politiko guztien babesarekin. Elkarretaratzea 13:00ean izan da, Erauskin Plazan, eta ehunka auzokidek bat egin dute.

Gipuzkoako Aldundiak gaitzetsi egin du sexu-erasoa, "emakumeak menderatzea bilatzen duen ideologian" sustraiak dituen indarkeria matxista gisa; eta herritarren eta erakundeen erantzuna behar duela adierazi du.

Aldundiak, prentsa-ohar batean, "errefusa eta gaitzespena" agertu du gertakariaren aurrean, eta "gertutasuna eta babesa" helarazi die "biktimari eta bere ingurukoei". Indarkeria mota hori "egiturazkoa" dela eta "erantzun egokia" ematea "denei" dagokiela gaineratu du.

Larunbat honetan, mugimendu feministak deituta, protesta ekitaldia egin dute Bideluze Plazan, eta ehunka izan dira parte hartu duten herritarrak.

-------------------------------------

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak eta / edo deitu doako telefono hauetako batera: 900 840 111 (Euskadin) edo 016 (Estatu osoan). Lehenak arrastoa uzten du fakturan eta telefonoan; bigarrenak, telefonoan. Beraz, ez ahaztu ezabatzea.