Gasteizko Mercedes-Benzeko zuzendariaren kontrako epaiketa abian da

Astelehen honetan abiatu da Gasteizen Emilio Titos Mercedes-Benz Espainiako zuzendari nagusi eta konpainiak Gasteizen duen lantegiko zuzendariaren eta haren semearen kontrako epaiketa. Zehazki, ausarkeriaz gidatzea eta sorospen-eginbeharra ez betetzea leporatzen diete.

Epaitutako gertakariak 2016ko irailean izan ziren. Fiskalaren idatziaren arabera, aita-semeek zilindrada handiko bi auto hartu omen zituzten Gasteizko lantegian, eta, abiadura handian gidatu omen zuten Arabako errepideetan barrena.

Salaketan jasotzen denez, Urizaharra udalerriaren parean, bata bestea aurreratzen ari zela, hirugarren auto bat errepidetik irtenarazi zuten. Istripua eragin ondoren, gainera, ez zioten lagundu zauritutako gidariari.

Fiskaltzak bina urteko kartzela-zigorra eskatu du bakoitzarentzat. Gainera, fiskalak 12.000 euroko isuna jartzea eta gidabaimena kentzea eskatu du beraientzat.