21 urteko zigorra Bartzelonako Maristetako irakasle ohiarentzat, sexu abusuengatik

Bartzelonako Auzitegiak 21 urte eta bederatzi hilabeteko espetxe zigorra ezarri dio Santseko (Bartzelona) Maristen ikastetxeko irakasle ohi Joaquin Benitezi, erlijiosoen ikastetxe horretan gorputz hezkuntzako irakasle zenean lau adingaberi sexu abusuak egiteagatik.

Marista Anaiak Sants-Les Corts eskolan lau adingaberi sexu abusuak egiteagatik zigortu du irakasle ohia Bartzelonako Audientziaren 21. sekzioak. Gutxienez beste hamar ikaslek salaketa jarri zuten gertakizun berberengatik, baina ez da epaiketarik egin, auzia preskribatuta dagoelako.

Fiskaltzak 22 urteko kartzela eta 14 urteko inhabilitazioa eskatu zuen abusuak onartu zituen pederastarentzat. Generalitateak eta Bartzelonako Udalak osatutako herri akusazioak, 35 eta 25 urteko kartzela zigorra, hurrenez hurren.

Kataluniako Auzitegi Nagusiak informatu duenez, epaiak 120.000 euroko kalte-ordaina ere ezarri du lau biktimentzat guztira, eta ikastetxearen ardura daukan Champagnat Fundazioa zigortu du, erantzule zibil subsidiario bezala.

Epaiaren arabera, "Champagnat Fundazioari ez zaio egotzi kaltea nahita egitea, kontrakoa baizik, hau da, jokaera zuhurtziagabea mendeko langile baten jarrera engainagarriaren gaineko kontrol faltagatik".

Epaian, Auzitegiak 13 urte eta zortzi hilabeteko irakaslea izateko inhabilitazioa ezarri dio Benitezi, eta biktimengana hurbiltzeko eta komunikatzeko debekua.

Maristetako gorputz hezkuntzako irakasle izatea zenbaitetan lau ikasleri sexu abusuak egiteko baliatu zuen. 1999tik 2011ra arte izan zen irakaslea. Bulego bat zuen, eta bertara eramaten zituen ikasleak, lesioak arintzeko masajeak egiteko. Bertan egiten zituen abusuak.

Aldeak deitu ditu epaitegiak. Benitez buru-beroki bat jantzita joan da, eta erabakia jakin ostean, adierazpenik egin gabe joan da.

Manuel Barbero, auzia ezagutzara eman zuen aita, bere abokatua besarkatu du, negarrez.

Ikastetxeak "babestua"

Martxoaren bukaeran egindako epaiketan, Benitezek bi adingaberi abusuak egin zizkiela onartu zuen, baina beste bi kasuetan ez zuela gogoratzen esan zuen.

Esan zuenez, erlijioko ordenaren arduradunek 1986ean egin zituen lehenengoetariko sexu abusu bat ezagutu zuten, eta horregatik "babestuta" sentitu zen.

Maristak auzia

Manuel Barbero adingabeetako baten aitak salaketa jarri ostean ezagutzara eman zen eskandalua. Bere semeak Benitezek sexu abusuak egin zizkiola kontatu zuen, 13-15 urte zituenean.

Guztira, 17 salaketa jarri ziren Benitezen kontra. Horietako 13 artxibatu egin ziren, gertakizunak preskribatuta zeudelako.

Barberok beste kasu batzuk kontatzeko helbide elektroniko bat ireki zuen. Ia 100 mezu jaso zituen, gutxienez 12 irakaslek egindako abusuak kontatuz 43 ikastetxetan.