Gizartea -
Indarkeria matxista
Gazte bat atxilotu dute Gasteizen, bikotekide ohiari eraso egitea egotzita
Udaltzaingoak 22 urteko ustezko erasotzailea Amarika plazan atxilotu zuen iragan igandean.
Agentziak | Erredakzioa
Gasteizko Udaltzaingoak 22 urteko gizon gazte bat atxilotu du genero indarkeria delitu bat leporatuta, bikotekide ohiari irain, mehatxu eta eraso egiteagatik.
Gasteizko Udalak agiri batean jakitera eman duenez, gertakaria iragan igandean jazo zen 07:00ak aldera, diskoteka baten ate aurrean, Florida kalean.
Gazte talde batek udaltzainei laguntza eskatu zien. Antza denez, diskotekatik kanpo gizon gazteak bikotekide ohia iraindu zuen, eta iletik tira egin zion. Biktimak xehetasunak eta mehatxuak baieztatu zituen.
Ustezko erasotzailea Amarika plazan atxilotu zuen Udaltzaingoak. Eztabaida izan zuela onartu zuen gizonak, baina erasoak ukatu zituen.
Hala ere, lekukoen eta aldeen azalpenak kontuan hartuta, gaztea atxilotzea erabaki zuten udaltzainek. Epailearen esku jarri dute dagoeneko.
Ospitalean artatzeko aukera eman zion Udaltzaingoak biktimari, baita salaketa une horretan aurkezteko ere.