Lau apaizen kontrako lau sexu-abusu salatu direla esan du Gipuzkoako Elizbarrutiak

Lau apaizek duela 38 eta 50 urte artean adin txikikoei egindako lau sexu-abusuen salaketa jaso ditu azken bi urtean Gipuzkoako Elizbarrutiak. Beraz, sexu-abusu horiek preskribatuta daude jada. Salatutako lau elizgizonetatik bi hilda daude.

2017an Juan Kruz Mendizabal "Kakux" Gipuzkoako bikario ohiak 2001 eta 2005 artean egindako sexu-abusuak publiko egin ostean, Munilla gotzainak sexu-abusuak salatzeko deialdi bat egin zuen. Deialdi horren ostean egindako salaketak lirateke lau horiek.

Donostiako Elizbarrutiak bere webgunean zabaldu duenez, deialdi horren ostean egindako salaketak lau izan ziren, guztiak ere duela 38 eta 50 urte bitartean gertaturikoak. Lau salaketa horietako bik egun hilda dauden bi apaizi egiten zioten erreferentzia. Dena den, Vatikanoa jakinaren gainean jarri ei zuen Donostiako Elizbarrutiak.

Delituak preskribatuta daudenez, Gipuzkoako Elizak prozesu kanonikoak abiatu zituen, salatzaileen oniritziarekin eta Vatikanoaren gainbegiradapean. Prozesua amaitutakoan, zigor kanonikoa ezarri zitzaien.

Radio Euskadiri eskainitako elkarrizketan Jose Ignacio Munillak adierazi zuenez, Eliza Katolikoa justizia zibila baino harago doa sexu-abusuen ikerketan.