Gizartea -
Indarkeria matxista
Epaileak aske utzi du Sara Majarenasen alabaren erasotzailea
Instrukzioa "larregi luzatu" dela argudiatu du epaileak erabakia hartzeko. Urruntzeko agindua eta kontrol telematikoa ezarri dizkio. Majarenasen abokatuak helegitea aurkeztuko du.
eitb.eus
Picassenteko Instrukzio Epaitegiak (Valentzia) baldintzapean aske utzi du Izar Sara Majarenas preso ohiaren alabari eraso egin zion gizona.
Epailearen autoa aipatuta Berria eta Naiz-ek zabaldu dutenez, epaitegiarekin loturarik ez duten arrazoiak tarteko instrukzio fasea gehiegi luzatu delako eta erasotzaileak bi urteko behin-behineko espetxealdia bete duelako erabaki du gizona aske uztea. Hala ere, umea eta ama babesteko asmoz, kautelazko hainbat neurri ezarri dizkio.
Euskal Herrira joatea nahiz bertan bizitzea galarazita izango du; kontrol telematiko bat eraman beharko du, non dagoen jakiteko eta haiengana hurbiltzen ez dela bermatzeko; astean behin epaitegian sinatu beharko du, eta egunero polizia-etxe batean; pasaportea kendu diote eta debekatuta izango du Estatutik ateratzea.
Sara Majarenasen abokatuak jakinarazi du erabaki horren aurkako helegitea aurkeztuko duela, eta Fiskaltzak ere gauza bera egiteko asmoa duela.
Asteazken honetan saio bat egingo dute epaitegian, erasotzaileari auzipetuta dagoela jakinarazteko eta instrukzio fasea amaitutzat emateko. Epaiketaren data oraindik zehaztu gabe dago.
