Gaurko 'elurrezko superilargia' datozen zazpi urteotako ikusgarriena izango da

Gaurko otsaileko superilargia, 'elurrezko superilargia' gisa ezaguna dena, 17:00etatik aurrera ikusi ahalko da Europan, Asian, Ozeanian eta Afrikan. 17:00etan oraindik egun argiz izango denez, ilundu arte itxaron beharko da ikuskizun astronomikoa bere osotasunean ikusteko.

Adituen esanetan, datozen zazpi urteotako ilargi beterik ikusgarriena eta distiratsuena izango da.

Gaurko 'superilargia' berezia izango omen da, izan ere, Ilargia Lurretik 356.762 kilometrora egongo da, bere orbitaren baitako punturik gertuenean hain zuzen ere. Hori dela eta, handiagoa ikusiko da.

Ikuskizunaz zuzenean gozatu ahal izateko, gune zabal eta ireki batera joatea gomendatzen dute adituek, hiriguneetako argi-kutsaduratik urrun.

Eta zergatik 'elurrezko superilargia'?

Otsaileko 'superilargi' horri 'elurrezko superilargia' ere deitzen diote, baina zergatik? Amerikar natiboek eta Erdi Aroko europarrek horrela deitzen zioten otsaileko ilargi beteari, hilabete hori elurteekin lotzen zutelako.