Pertsona transexual bat hil da Valladoliden, eraso bat jasan eta hilabetera

Abuztuaren 12an eraso bat jasan zuenetik Valladolideko ospitale batean koman zegoen 59 urteko emakume transexual bat hil da, el Norte de Castilla egunkariak bere edizio digitalean zabaldu duenez.

59 urteko biktima Vallsur merkatalgunearen inguruetan aurkitu zuen egun hartan segurtasun zaindari batek, eraso bortitz bat jasan izanaren zantzu argiekin. Anbulantzia bati deitu eta larri eraman zuten ospitalera.

Ordu batzuk geroago, 15 urteko gazte batek bere burua entregatu zuen Polizia Nazionaren komisaria batean, erasoaren egilea zela aitortuz eta telefono mugikorra ere lapurtu ziola gaineratuz. Zambrana adin-txikikoen zentroan dago egun hartaz geroztik. Orain, homizidio delitua egotziko diote, emakumea hil ostean.

Valladolideko kolektibo transexualak kontzentrazioa deitu du urriaren 20rako.