Gizartea -
Iruñea
Maravillas gaztetxeak 'indarkeriari eutsi dion herri-erantzuna' eskertu du
Taldeak, Iruñean ostiral honetako arratsaldean egindako biltzar batean, esan du "guztiz faltsua" dela hustea lasaia izana: "Husteek beti ekartzen dute indarkeria", nabarmendu dute.
Agentziak | Erredakzioa
Rozalejoko Markesaren Jauregitik atera duten 'Maravillas Gaztetxea' izeneko mugimendu okupak eskerrak eman ditu, Iruñeko Gaztelu plazan egindako biltzar batean, "Poliziaren indarkeriari eutsi dion herri-erantzunagatik"; ehunka lagun izan dira goizean deitu duten biltzar horretan.
Taldeak nabarmendu du "guztiz faltsua" dela hustea lasaia izana; Maria Solana Foru Gobernuaren bozeramaileak, aldiz, azpimarratu du ez dela izan "ez zauriturik, ezta atxiloturik ere".
"Ez dago huste baketsurik. Husteek beti ekartzen dute indarkeria", esan dute okupek; azken horiek galdetu dute "non dagoen Gobernuaren elkarrizketa-asmoa"; Exekutiboak, esan dutenez, bere gain hartu behar ditu "gertatutakoaren erantzukizunak".
Salatu dutenez, hustea "auzoaren aurkako erasoa" izan da, eta, adierazi dutenez, Foru Gobernuak "UPNK duela urte batzuk egin zuen bezala jardun du".
"Nafarroan aldaketa baten alde borrokatu dutenen aurkako erasoa da", esan du Gaztelu plazan; bertatik, kalejiran, Geroa Bairen egoitzara joaten saiatu dira, eta tentsio-uneak izan dira, Polizia Nazionalarekin.
