Gobernuak akordio batera iristeko duen 'nahi faltsua' salatu du Maravillas gaztetxeak

Iruñeko Maravillas gaztetxea kudeatzen duen gazteen kolektiboak Nafarroako Gobernuak "akordio batera iristeko" duen "nahi faltsua" salatu du asteazken honetan, "berehalako huste" baten aurrean.

Kolektiboak, astearte honetan eskaini zuen prentsaurrekoaren ostean, ohar batean adierazi duenez, Maria Solana Nafarroako Gobernuko bozeramailea gaztetxeko batzarrarekin harremanetan jarri da, Gobernua hitz egiteko prest dagoela jakinarazteko.

Kolektiboak azaldu du elkarrizketa-mahai bat irekitzeko proposamena bilera batean zehaztuko litzatekeela, foru Gobernuaren "bulego batean", "gaur eta bihar artean", eta gaztetxeko batzarraren ordezkari batzuk eta Uxue Barkos presidentea eta Maria Solana joango liratekeela.

Proposamenak "ez du aurreikusten inolaz ere kautelazko hustea kentzeko aukera", eta hain justu hori da batzarrak "beharrezkotzat" ikusten duena "elkarrizketa mahai zintzo bat, behartzerik gabekoa, egiteko".

"Proposamen horrek batzarrak eskatutako baldintzak bete ez arren, onartu egin dugu, Gobernuari entzuteko nahia, berriro ere, erakusteko", esan du.

Halaber, "baldintza bakarra" bilera "gune neutro batera" pasatzea zen, "auzoko izaera zuen batera, besteak beste, Auzoenera, eta ostiralera atzeratzea", asteazken honetan Maravillas Lambertori egin behar dioten omenaldia estaltzea ekiditeko. Lamberto gazteak errepresaliak hartu zituen Larragan, Gerra Zibilean, UGTko militante baten alaba izateagatik.

Proposamen horri uko egin dio erabat bozeramaileak, eguna "inolaz ere" aldatu nahi ez, eta beste aukerarik bilatu nahi ez izanda; "akordio batera ez iristeko asmoa argi geratu da", salatu dute.