Aireportuan atxikita dagoen senidearen iruzurraz ohartarazi du Iruñeko Udaltzaingoak

Iruñeko Udaltzaingoak aireportuan atxikita dagoen ustezko senidearen iruzurraz ohartarazi du. Hori dela eta, gisa horretako telefono deiei sinesgarritasunik ez emateko eskatu die herritarrei.

Iruzurra egiteko, ustezko senide batek (gehienetan iloba gisa aurkezten da) dei egiten dio biktimari, aireportu batean atxikita dagoela eta libre geratzeko dirua behar duela esanez.

Udaltzaingoak gaineratu duenez, zenbait kasutan beste iruzurgile bat jartzen da telefonoan aduanetako funtzionario baten papera egiteko, eta ustezko senideak esandakoa baieztatzen du.

Gero, iruzurgileek dirua modu azkar batean nola bidali azaltzen diote biktimari (gehienetan adineko pertsona bat izan ohi da). Oro har, 3.000 euro eskatzen dituzte.