Alokabidek emakume bat etxegabetu du Bilbon, 6.300 euro zor dituelako

EH Bilduko hainbat politikarik Alokabidek Bilboko Alde Zaharrean 6.300 zor dituen emakume bat etxegabetu izana salatu du. Etxegabetzeen kontrako protokoloa zalantzan jarri dute, ez duelako etxebizitza publiko batetik botatako pertsona horiei beste nonbait ostatu emateko aukerarik aurreikusten.

Aitziber Ibaibarriaga, alderdiak Bilboko Udaleko taldean duen bozeramaileak, eta Iker Casanova parlamentariak protesta egin dute Urazurrutia kaleko 10. zenbakian dagoen etxebizitzaren aurrean. Han etxegabetu zuten emakumea joan den azaroaren 14an.

Ibaibarriagak adierazi duenez, emakumeak proposamen ofiziala egin zuen zorra negoziatu eta etxegabetzea atzeratzeko, baina Eusko Jaurlaritzak baztertu egin zuen.

Horrez gain, halako kasuek EAJren hipokresia agerian uzten dutela esan du, "pertsonak alderdi jeltzalearen politikaren ardatz direla" esaten dutelako.

EH Bilduren bozeramaileak alternatiba bat bila dezan eskatu dio Juan Mari Aburto Bilboko alkateari. "Bi irtenbide daude: Udalak Eusko Jaurlaritzari beste nonbait ostatu eman diezaion eskatzea edo Udalak berak etxebizitza publiko batean bizitzeko aukera ematea emakume kaltetuari", azpimarratu du.

Bestalde, Casanovak "etxebizitzei dagokien politika koordinatuko duen instituzio bat sortzeko beharra" nabarmendu du, "kontraesanak saihesteko".